ភ្នំពេញៈ បុរសម្នាក់ផឹកស្រាស្រវឹងជ្រុល ដើរទៅមុខលែងរួច ប្រាសខ្លួនដេកតាមផ្លូវ បង្កការភ្ញាក់ផ្អើល កាលពីម៉ោង១០ព្រឹកថ្ងៃទី១៦ ខែវិច្ឆិកា ឆ្នាំ២០១៧ ស្ថិតនៅចិញ្ចើមផ្លូវសហព័ន្ធរុស្សី មុខអាកាសយានដ្ឋានអន្តរជាតិពោធិចិនតុង ភូមិតាងួន សង្កាត់កាកាប ខណ្ឌពោធិ៍សែនជ័យ ។
បើតាមបុរសខាងលើ បានឲ្យដឹងថា គាត់ឈ្មោះ អ៊ុក ខឿន ភេទប្រុស អាយុ៣៧ឆ្នាំ មុខរបរកសិករ រស់នៅ ភូមិពោធិមុខ ឃុំគោកព្រិច ស្រុកគីរីវង់ ខេត្តតាកែវ មានប្រពន្ធឈ្មោះ ចាន់ នី អាយុ៣៧ឆ្នាំ មុខរបរ បុគ្គលិកស៊ិនទ្រី បោសសម្រាម ម្តុំវត្តភ្នំ មានកូនចំនួន៤នាក់។
បុរសខាងលើ បានបន្តថា គាត់ធ្វើដំណើរចេញពីស្រុកកំណើតចំនួន៣ថ្ងៃមកហើយ គោលបំណងឆ្ពោះទៅរកប្រពន្ធធ្វើការនៅម្តុំវត្តភ្នំ ហើយនៅព្រឹកថ្ងៃទី១៦ ខែវិច្ឆិកានេះ គាត់ដើរចេញពី ចោមចៅ ដោយតាមផ្លូវឆ្លៀតទិញស្រាស កន្លះលីត្រ ផឹកកំដរ លុះដើរមកដល់មុខព្រលាន មានម៉ូតូកង់បីគេហៅឲ្យជិះ បានបន្តិច ឲ្យចុះវិញ ហើយគាត់ស្រវឹងស្រាផង ក៏ប្រាសខ្លួនដេកសិនរហូតដល់ប៉ូលិស ដើរមកដាស់ហៅឲ្យក្រោកតែម្តង៕