ពេលនេះសាកលវិទ្យាល័យ ភូមិន្ទភ្នំពេញ (RUPP) បានរៀបចំកិច្ចការថ្មីមួយ គឺបំពាក់អំពូលភ្លើង ប្រើសូឡាថាមពលពន្លឺព្រះអាទិត្យ បំភ្លឺបរិវេណសាកលវិទ្យាល័យ ដើម្បីជួយដល់ការសិក្សារៀនសូត្ររបស់និស្សិត នៅពេលយប់ព្រលប់ , ដូច្នេះនិស្សិតគ្រប់ៗគ្នា នឹងមានអារម្មណ៍ចម្លែកសប្បាយនៅពេលយប់ ។
លោក ជេត ជាលី សាកលវិទ្យាធិការ នៃសាកលវិទ្យាល័យភូមិន្ទភ្នំពេញ បានឱ្យដឹងថា ដើម្បីជួយដល់និស្សិតរៀនវេនយប់ ដំបូងត្រូវបំពាក់អំពូលភ្លើងចំនួន ១៦បង្គោលសិន , បន្ទាប់មកនឹងបន្ថែមច្រើនកន្លែងទៀត ដើម្បីធ្វើយ៉ាងណាបម្រើឱ្យផលប្រយោជន៍សាលាផង និងប្រយោជន៍និស្សិតផង។
ការបំពាក់អំពូលភ្លើងសូឡា ក្នុងបរិវេណសាលានេះ មានប្រយោជន៍ច្រើនយ៉ាងណាស់ ដូចជាជួយសម្រួលដល់ការសិក្សានៅពេលយប់របស់និស្សិត ធ្វើឱ្យបរិវេណសាលាមានសុវត្ថិភាព បង្កើនសោភ័ណភាពសាលានៅពេលយប់ ជាទីហាត់ប្រាណរបស់ពលរដ្ឋ ពិសេសភ្លើងសូឡានេះមិនបានប៉ះពាល់ដល់បរិយាកាស និងបរិស្ថានឡើយ សំខាន់មួយទៀត គឺបានឱ្យសាលាសន្សំប្រាក់កាកចំពោះការប្រើប្រាស់ភ្លើង។
ឆ្លើយតបនឹងការរៀបចំអំពូលភ្លើងបំភ្លឺពេលយប់ ដែលជាជំនួយរបស់ក្រុមហ៊ុន B Green មកពីប្រទេសថៃ និស្សិតមួយចំនួនសិក្សានៅ RUPP បាននិយាយថា ពួកគេពិតជាសប្បាយចិត្តខ្លាំងណាស់ ដែលថ្នាក់ដឹកនាំសាកលវិទ្យាល័យមួយនេះ បានរៀបចំបំពាក់ភ្លើងបំភ្លឺនៅពេលយប់ ក្នុងបរិវេណសាលា ព្រោះជួយឱ្យនិស្សិតបានសិក្សា ស្វ័យសិក្សានៅពេលយប់ព្រលប់ និងមានសុវត្ថិភាពដល់ពួកគេទៀតផង៕
