ភ្នំពេញៈ សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា បានសប្បាយចិត្ត ដែលឃើញចៅៗខិតខំយកចិត្តទុកដាក់រៀនសូត្រគ្រប់ៗគ្នា និងជូនពរជនរួមជាតិជួបតែសេចក្តីសុខមានសុភមង្គលក្នុងក្រុមគ្រួសារ។
យោងតាមគេហទំព័រហ្វេសប៊ុករបស់សម្ដេច ហ៊ុន សែន នៅថ្ងៃទី២៥ ខែធ្នូ ឆ្នាំ២០១៧ បានឲ្យដឹងថា ឪពុក ម្តាយគ្រប់រូបតែងតែចង់បានកូនចៅល្អ ដូច្នេះក្មួយៗ និងចៅៗ ត្រូវខិតខំរៀនសូត្រទាន់ខ្លួននៅក្មេង ហើយត្រងត្រាប់ស្តាប់ដំបូន្មានល្អៗរបស់ឪពុកម្តាយ លោកយាយលោកតា និងលោកគ្រូអ្នកគ្រូ ដើម្បីក្លាយជាកូនល្អ និងជាពលរដ្ឋល្អរបស់ប្រទេសជាតិ។
សម្ដេចថា “ខ្ញុំសប្បាយចិត្ត ដែលចៅៗខិតខំយកចិត្តទុកដាក់រៀនសូត្រគ្រប់ៗគ្នា សូមជូនពរបងប្អូនជនរួមជាតិជួបតែសេចក្តីសុខ និងមានសុភមង្គលក្នុងក្រុមគ្រួសារកុំបីខាន”។
សម្ដេចបន្ថែមថា ធាតុអាកាសនៅថ្ងៃទី២៥ ធ្នូ នៅខាងក្រៅ គឺមិនរងារត្រជាក់ខ្លាំងដូចប៉ុន្មានថ្ងៃមុនទេ។ ទោះយ៉ាងណាក៏ដោយ សូមបងប្អូនថែរក្សាសុខភាពឲ្យបានល្អ គឺត្រូវហាត់កីឡាអោយបានទៀងទាត់ យ៉ាងហោចណាស់៣០នាទីក្នុង១ថ្ងៃ៕
