បាល់ទាត់ៈ កីឡាករ ចាន់ វឌ្ឍនាកា បានប្រកាសជាសាធារណៈ នៅល្ងាចថ្ងៃសុក្រ ទី១៥ ខែធ្នូ ឆ្នាំ២០១៧ ម្សិលមិញថា រូបគេនឹងចូលរួមជាមួយក្រុម Panhag FA សមាជិកលីគកំពូលប្រទេសម៉ាឡេស៊ី (Malaysia Super League) ក្នុងរយៈពេល១រដូវកាល នៅឆ្នាំ២០១៨ ខាងមុខ ស្របពេលដែលមានដំណឹងលេចឭថា កីឡាកររូបនេះ ទទួលបានកម្រៃពលកម្មប្រមាណជិត២ម៉ឺនដុល្លារអាមេរិក។
កីឡាករវ័យ២៣ឆ្នាំរូបនេះ បានប្រកាសថា «ខ្ញុំមានកិត្តយសសូមជម្រាបជូនពុកម៉ែបងប្អូនអ្នកគាំទ្រទាំងអស់គ្នាថា ខ្ញុំបានចុះកិច្ចសន្យាមួយឆ្នាំជាមួយក្លិប Pahang FA ប្រទេសម៉ាឡេស៊ី សូមពុកម៉ែបងប្អូនទទួលជោគជ័យក្នុងអាជីពនៅទីនេះ»។ យ៉ាងណាក្តី ក្រោយចុះកិច្ចសន្យាជាមួយក្រុមជើងឯករងលីគកំពូលម៉ាឡេស៊ី នេះរួចរាល់ ចាន់ វឌ្ឍនាកា ត្រូវត្រឡប់មកកម្ពុជាវិញ នៅព្រឹកថ្ងៃសៅរ៍ នេះវិញ។
កីឡាករដែលជាកូនប្រុសអភិបាលខេត្តកំពត រូបនេះត្រូវបានសារព័ត៌មានមួយចំនួនអះអាងថា នឹងទទួលបានប្រាក់ខែរហូតដល់១៥០០០ដុល្លារ ជាមួយក្លិបថ្មីនៅប្រទេសម៉ាឡេស៊ី បូកទាំងប្រាក់ចំណាយផ្សេងៗប្រហែល៥០០០ដុល្លារទៀត មានរថយន្តមួយគ្រឿង ខុនដូរមួយល្វែង ព្រមទាំងអត្ថប្រយោជន៍ដទៃទៀត។
ចំណែកកិច្ចសន្យារបស់ ចាន់ វឌ្ឍនាកា ជាមួយក្លិប Fujieda MYFC សមាជិកពានរង្វាន់លីគលំដាប់ទី៣ (J3-league) នឹងផុតនៅថ្ងៃទី៣១ ខែធ្នូ ឆ្នាំ២០១៧ ខាងមុខនេះ តែរូបគេបានធ្វើដំណើរត្រឡប់មកប្រទេសកំណើតមុនកិច្ចសន្យាក្រោយក្លិបមួយនេះ អស់ការប្រកួតប្រចាំរដូវកាល។ ប្រភពស្និតនឹងកីឡាកររូបនេះ បានបញ្ជាក់ថា វឌ្ឍនាកា កំពុងទទួលបានការចាប់អារម្មណ៍ពីក្លិបនៅថៃ សិង្ហបុរី និងនៅអឺរ៉ុប ផងដែរ ក្រៅពីក្លិបនៅម៉ាឡេស៊ី៕
