ព្រះសីហនុៈ ជនសង្ស័យ១ក្រុម បានធ្វើសកម្មភាពស្ទាក់ឃាត់ និងប្រើដំបង-ដាវ វាយ និងកាប់ទៅលើរថយន្ត១គ្រឿង ដែលដឹកកម្មករពេញរថយន្ត បណ្តាលឲ្យបែកកញ្ចក់ទ្វាររថយន្តចំនួន៣ផ្ទាំង នៅចំណុចតំបន់សេដ្ឋកិច្ចពិសេស ស្ថិតក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ។
ករណីហិង្សាដោយចេតនានេះ បង្កឡើងកាលពីថ្ងៃព្រហស្បតិ៍ ៤កើត ខែបុស្ស ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២១ ខែធ្នូ ឆ្នាំ២០១៧ វេលាម៉ោង៩ និង៤០នាទី នៅចំណុចកើតហេតុខាងលើ។
ក្រោយពីទទួលបានព័ត៌មាននេះភ្លាម ឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានបញ្ជាទៅការិយាល័យជំនាញ និងលោកអធិការនគរបាលស្រុកព្រៃនប់ ឲ្យកម្លាំងសមត្ថកិច្ចចុះប្រតិបត្តិការបង្ក្រាប ហើយជាលទ្ធផលកម្លាំងបានឃាត់ខ្លួនជនសង្ស័យ១ក្រុម មានគ្នា៩នាក់។
ជនសង្ស័យដែលឃាត់ខ្លួនទី១.ឈ្មោះ រីម សុខយ៉ាន ភេទប្រុស អាយុ២០ឆ្នាំ មុខរបរកម្មកររោងចក្រ ទី២.ឈ្មោះ រុន ប៉ាវ ភេទប្រុស អាយុ២០ឆ្នាំ មុខរបរកម្មកររោងចក្រ ទាំង២នាក់នេះ មានទីលំនៅភូមិអូរជ្រៅ ឃុំអូរជ្រៅ ស្រុកព្រៃនប់។ ចំណែកទី៣.ឈ្មោះ ចក់ រុី ភេទប្រុស អាយុ១៧ឆ្នាំ មុខរបរកម្មកររោងចក្រ មានទីលំនៅភូមិកោះខ្យង ឃុំអូរជ្រៅ ស្រុកព្រៃនប់ ខេត្តព្រះសីហនុ ទី៤.ឈ្មោះ ស៊ុន គួយ ភេទប្រុស អាយុ២០ឆ្នាំ មុខរបរកម្មកររោងចក្រ មានទីលំនៅភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ ដោយឡែកជនសង្ស័យទី៥.ឈ្មោះ ស៊ុន គីម ភេទប្រុស អាយុ២៤ឆ្នាំ មុខរបរកម្មកររោងចក្រ មានទីលំនៅភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ ទី៦.ឈ្មោះ ចាន់ ដារ៉ារូ ភេទប្រុស អាយុ១៨ឆ្នាំ មុខរបរកម្មកររោងចក្រ ទី៧.ឈ្មោះ ខន ឡុង ភេទប្រុស អាយុ១៨ឆ្នាំ មុខរបរកម្មកររោងចក្រ ទី៨.ឈ្មោះ សុខ សុីលៀង ភេទប្រុស អាយុ២១ឆ្នាំ មុខរបរកម្មកររោងចក្រ និងទី៩.ឈ្មោះ សាំង សុខភ័ក្រ្ត ភេទប្រុស អាយុ២៦ឆ្នាំ មុខរបរកម្មកររោងចក្រ។ ជនសង្ស័យទាំង៤នាក់នេះ មានទីលំនៅឃុំបិតត្រាំង ស្រុកព្រៃនប់។
រីឯអ្នកបើកបរជាម្ចាស់រថយន្តរងគ្រោះឈ្មោះ សាន ឡាយធាន់ ភេទប្រុស អាយុ២៦ឆ្នាំ មុខរបរបើករថយន្តដឹកកម្មករ មានទីលំនៅភូមិទួល ឃុំទឹកល្អក់ ស្រុកព្រៃនប់។
ក្រោយចាប់ខ្លួន ជនសង្ស័យទាំង៩នាក់ខាងលើ ត្រូវបានកម្លាំងជំនាញកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមច្បាប់៕
