ភ្នំពេញៈ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានថ្លែងថា ប្រទេសកម្ពុជា បានឆ្លងកាត់លំបាក និងឈឺចាប់គ្រប់គ្រាន់ហើយ ដូច្នេះមិនត្រូវឲ្យអ្នកណាម្នាក់មកបំផ្លាញសន្តិសុខនោះទេ។
ក្នុងន័យរបស់សម្តេចដែលសំដៅដល់នេះ បន្ទាប់ពីកម្ពុជាបានបង្ក្រាបបដិវត្តពណ៌យ៉ាងជោគជ័យ កាលពីពេលថ្មីៗនេះ ក្រោយពីមានបរទេសនៅពីក្រោយមេបក្សប្រឆាំងដែលមានបំណងចង់ផ្តួលរំលំរាជរដ្ឋាភិបាលស្របច្បាប់។
ក្នុងពិធីបើកបុណ្យសមុទ្រឆ្នាំ២០១៧ នៅខេត្តកែប នៅល្ងាចថ្ងៃសៅរ៍ ៦កើត ខែបុស្ស ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៣ ខែធ្នូ ឆ្នាំ២០១៧ សម្តេចតេជោ បានថ្លែងថា “ប្រទេសកំសត់មួយនេះ ទទួលការឈឺចាប់លើសពីការគ្រប់គ្រាន់ណាស់ទៅហើយ មិនត្រូវឲ្យប្រទេសណាមួយ ឬក្រុមណាមួយបំផ្លាញសន្តិភាពនៅក្នុងប្រទេសនេះតទៅទៀតទេ ទោះដោយតម្លៃណាក៏ដោយ យើងទាំងអស់ត្រូវរក្សាសន្តិភាពនេះឲ្យខាងតែបាន ដើម្បីធានាដល់ការអភិវឌ្ឍ”។
សម្តេចតេជោបានថ្លែងទៀតថា អាជ្ញាធរពាក់ព័ន្ធ ត្រូវសហការជាមួយប្រទេសក្បែរខាង ការពារមិនឲ្យមានក្រុមប្រព្រឹត្តអំពើខុសច្បាប់ រហូតទៅដល់ក្រុមភេរវកម្មមកជ្រកកោន ដើម្បីបានចេញទៅវាយប្រហារប្រទេសនេះ ប្រទេសនោះ តាមអំពើចិត្ត។ ត្រូវខិតខំបន្តរក្សាតំបន់សមុទ្រកម្ពុជាឲ្យបានល្អស្អាត និងសុវត្ថិភាព ដោយមិនត្រូវបណ្តោយឲ្យសមុទ្រកម្ពុជាក្លាយទៅជាកន្លែងជ្រកកោន នៃពួកជួញដូរគ្រឿងញៀន ជួញដូរមនុស្ស និងពួកឧក្រិដ្ឋកម្មឆ្លងដែន៕
