
ភ្នំពេញៈ រថយន្តបែនមួយគ្រឿង បានក្រឡាប់ផ្ញារជើងនៅលើរនាំងផ្លូវដែករថភ្លើង បង្កការភ្ញាក់ទាំងព្រឹកថ្ងៃទី៧ ខែធ្នូ ឆ្នាំ២០១៧ ស្ថិតនៅក្បែរវត្តតាំងកសាងខាងត្បូង ភូមិព្រៃសាលា សង្កាត់កាកាប១ ខណ្ឌពោធិ៍សែនជ័យ ។
រថយន្តដែលក្រឡាប់ខាងលើនេះ ម៉ាកនីសាន់ បែនកង់៦ ពណ៌ស ពាក់ស្លាកលេខ ចង្កូតស្តាំ PP- 0641 អ្នកបើកបរ ឈ្មោះ ហ៊ិន ឌឿន ភេទប្រុស អាយុ៣៦ឆ្នាំ មុខរបរ កម្មករបើកបរររថយន្ត ដេប៉ូលក់គ្រឿងសំណង់ ស្នាក់នៅម្តុំផ្សារដីហុយ សង្កាត់ភ្នំពេញថ្មី ខណ្ឌសែនសុខ មានស្រុកកំណើត ភូមិដូនទ្រា ឃុំរលាំងគ្រើល ស្រុកសំរោងទង ខេត្តកំពង់ស្ពឺ។

តាមសម្តីអ្នកបើកបរ រថយន្ត បានឲ្យដឹងថា មុនពេលកើតហេតុ ខណៈគាត់មិនស្រួលខ្លួន បានបើករថយន្តក្នុងបំណងទៅយកខ្សាច់នៅគីឡូម៉ែត្រលេខ៩ ស្រាប់តែបើកមកដល់លើផ្លូវដែក ទួល ជាប់លេខ៤ លែងទៅមុខ សាងលេខមិនទាន់ ពេលនោះរថភ្លើងខ្សែអូសសណ្តោងទូដឹកប្រេង មកដល់ក៏បុកតែម្ដង។
តាមបុគ្គលិកប្រចាំការ ផ្លូវដែកត្រង់ចំណុចខាងលើបានឲ្យដឹងថា មុនពេលកើតហេតុ ខណៈដែលរថភ្លើងមួយខ្សែដឹកប្រេង បើកពីលិចទៅកើតជិតមកដល់ គាត់បានចេញមក ធ្វើចរាចរណ៍ ការពារចុចភ្លើងជាសញ្ញា ស្រាប់តែរថយន្តបង្កបើកពីត្បូងទៅជើងឡើងទៅដល់លើផ្លូវដែកឆ្លងកាត់ អ៊កស៊ើឈប់រវល់តែសាងលេខ ស្រាប់តែរថភ្លើងមកដល់ល្មម ទើបបណ្តាលឲ្យបុកប៊ើងបោកផ្ទប់ទៅលើរនាំង ការពារផ្លូវដែក បណ្តាលឲ្យបាក់ខ្ទេច។
បច្ចុប្បន្នរថយន្ត ត្រូវបានសមត្ថកិច្ចស្ទូចយកទៅរក្សាទុកនៅផ្នែកជំនាញស្នងការក្រុងភ្នំពេញ រង់ចាំដោះស្រាយ ជាមួយក្រុមហ៊ុនអាយស្ម័យាន ជាក្រោយ៕


