ត្បូងឃ្មុំៈ ក្រុមជនសង្ស័យចំនួន៣នាក់ ដែលតែងតែយកឈ្មោះប្រមុខថ្នាក់ដឹកនាំ នៅខុទ្ទកាល័យសម្តេចតេជោ ក្រសួងមុខងារសាធារណៈ ក្រសួងមហាផ្ទៃ ឬក្រសួងដទៃទៀត ដើម្បីធ្វើការឆបោកថា នឹងរត់ការតំឡើងសក្តិយស ផ្ទេរតំណែង ឡើងប្រាក់បៀវត្សរ៍ ជូនដល់កងកម្លាំងប្រដាប់អាវុធ មន្ត្រីរាជការនៅតាមស្ថាប័ននានា ត្រូវសមត្ថកិច្ចបង្ក្រាប និងឃាត់ខ្លួនបានហើយ ព្រមទាំងបានកសាងសំណុំរឿងបញ្ជូនទៅតុលាការផងដែរ កាលពីថ្ងៃទី១៨ ខែធ្នូ ឆ្នាំ២០១៧ បន្ទាប់ពីកម្លាំងនគរបាលខេត្តត្បូងឃ្មុំ សហការណ៍ជាមួយកម្លាំងនគរបាលស៊ើបការណ៍ខាងក្រៅនិងបច្ចេកទេស និងប្រឆាំងបទល្មើសបច្ចេកវិទ្យានៃអគ្គស្នងការដ្ឋាននគរបាលជាតិ ចាប់ខ្លួនកាលពីថ្ងៃ១៣ ខែធ្នូ កន្លងទៅថ្មីៗ នៅចំណុចភូមិនិគមក្រោម ឃុំស្រឡប់ ស្រុក ខេត្តត្បូងឃ្មុំ។
សមត្ថកិច្ចបានឲ្យដឹងថា ជនសង្ស័យដែលត្រូវឃាត់ខ្លួនរួមមាន៖ ១-ឈ្មោះខន សុម៉ាលី ហៅស្រីទូច ២-ឈ្មោះថា សុផាត ត្រូវជាប្តីស្រីទូច និងទី៣-ឈ្មោះខន សុរិយា ហៅស្រីពៅ ជាប្អូនរបស់ស្រីទូច(ជាអ្នកបំផ្លាញវត្ថុតាង)។
សមត្ថកិច្ចបានបន្តទៀតថា ពួកគេបានប្រើប្រាស់ទូរស័ព្ទសម្រាប់ធ្វើសកម្មភាពឆបោកមនុស្សជាច្រើន ដោយបានប្រើទូរស័ព្ទដែលមានលេខដូចខាងក្រោម៖ 092 249333 / 092 615522 / 096 5520906 / 097 4465888 / 097 2803666 / 097 8252666 / 031 7644448។
សមត្ថកិច្ចបានបញ្ជាក់ទៀតថា ពួកគេតែងតែក្លែងបន្លំថា ខ្លួនជា ឯកឧត្តម រដ្ឋលេខាធិការ អគ្គនាយក លោកជំទាវ ឬជាថ្នាក់ដឹកនាំផ្សេងៗ ដើម្បីធ្វើសកម្មភាពឆបោក។ ករណីនេះឈ្មោះខន សុម៉ាលី និងឈ្មោះថា សុផាត អាចត្រូវប្រឈមការដាក់ពន្ធនាគារពី២ឆ្នាំទៅ៥ឆ្នាំ(មាត្រា៣៨០) ដោយឡែកឈ្មោះសុរិយា អាចប្រឈមនឹងការដាក់ពន្ធនាគារ ពី១ឆ្នាំទៅ៣ឆ្នាំ និងពិន័យជាប្រាក់ពី២លានរៀលទៅ៦លានរៀល(មាត្រា៥៣៣)។
ក្នុងនោះសមត្ថកិច្ចក៏បានសំណូមពរដល់បងប្អូនដែលត្រូវបានអ្នកប្រើប្រាស់លេខទាំងនេះបោកប្រាស សូមមកដាក់ពាក់ប្តឹងបន្ថែម ដោយកម្លាំងជំនាញនៅរង់ចាំទទួលជារៀងរាល់ម៉ោងធ្វើការ។
ករណីនេះបច្ចុប្បន្នសមត្ថកិច្ចកំពុងធ្វើការសឹក្សាស្រាវជ្រាវតាមបច្ចេកទេសជំនាញ ដើម្បីតាមស្វែងរកចាប់មុខសញ្ញាដែលនៅសេសសល់បន្តទៀត ៕
