ភ្នំពេញៈ បុរសជនជាតិអាមេរិតកាំងម្នាក់ បាននាំងស្រីខារាអូខេដើរលេងរួចផឹកស្រាស្រវឹងស្រឿងៗនាំនាងទៅដេកផ្ទះសំណាក់មិនព្រមឈ្លោះប្រកែកគ្នាផ្អើលសមត្ថកិច្ចទាំងយប់ កាលពីវេលាម៉ោង២នឹង៣០នាទីទៀបភ្លឺថ្ងៃទី១០ ខែធ្នូ ឆ្នាំ២០១៧ ស្ថិតតាមបណ្តោយផ្លូវលេខកា៥ចំណុចមុខផ្ទះគ្មានលេខ ភូមិចុងខ្សាច់ សង្កាត់ទួលសង្កែ១ ខណ្ឌឫស្សីកែវ។
ស្ត្រីរងគ្រោះឈ្ មោះអូន សុជា អាយុ២៤ឆ្នាំ មានមុខរបរជាស្រីបម្រើខារាអូខេ និងស្នាក់បន្ទប់ជួលកើតហេតុ មានស្រុកកំណើតនៅភូមិកោះកណ្ដាល ឃុំទាមកោះស្នា ស្រុកស្ទឹងត្រង់ ខេត្តកំពង់ចាម។។ ចំណែកជនបង្កឈ្មោះ AlT BaHyOussEF ភេទប្រុស អាយុ៣៨ឆ្នាំ ជាជនជាតិអាមេរិតកាំងស្នាក់នៅកើតហេតុខាងលើ។
ស្ត្រីរងគ្រោះ បានឲ្យដឹងថា មុនកើតហេតុនៅវេលាម៉ោងប្រហែល១២យប់បុរសជនជាតិអាមេរិកកាំងខាងលើ បាននាំនាងនិងមិត្តភក្កិស្រីរបស់នាង២នាក់ទៀតទៅដើរលេងជាមួយគ្នានៅម្តុំមាត់ទន្លេ ហើយបាននាំគ្នាផឹកស្របៀរអស់ចំនួន៤ម៉ឺនរៀល រាងស្រវឹងស្រឿងៗ បន្ទាប់មកមិត្តភក្តិស្រីទាំង២នាក់បានសុំត្រឡប់ទៅផ្ទះមុនបាត់អស់នៅតែរូបគេតែ២នាក់។
ស្ត្រីរងគ្រោះ បន្តថា ក្រោយពីមិត្តភក្តិចេញទៅផ្ទះបាត់អស់ ស្រាប់តែបុរសនោះបានលួងលោមនាងទៅដេកនៅផ្ទះសំណាក់ តែនាងមិនព្រមទៅ ហើយរូបនាងក៏បានហៅម៉ូតូឌុបជិះត្រឡប់មកស្នាក់នៅវិញ ហើយបុរនោះក៏បានជិះម៉ូតូឌុបមួយគ្រឿងផ្សេងទៀតមកតាមក្រោយ ខណៈពេលមកដល់ចំណុចកើតហេតុខាងលើ បុរសនោះបានតាមរករឿងនាងមិនឲ្យចូលដេកក្នុងបន្ទប់ជួល ព្រមទាំងចោទថា នាងបានលួចលុយរូបគេអស់៥០ដុល្លារ ហើយបានដេញវាយនាងបង្កឲ្យមានការណ៍ភ្ញាក់ផ្អើលដល់សមត្ថកិច្ចទាំងយប់។
ក្រោយកើតហេតុសមត្ថកិច្ចបាននាំស្រ្តីរងគ្រោះនឹងបុរសបង្កទៅប៉ុស្តិ៍នគរបាលសង្កែ១ដើម្បីសាកសួរបន្ទាប់មកស្រ្តីរងគ្រោះបានដាក់ពាក្យបណ្តឹងទាមទារសំណងជំងឺចិត្តចំនួន១០០ដុល្លារ៕
