Sponsor
អាម៉ាប៉ាប៉ាញ៉ូស

ស្វាយរៀងៈ យុវជនម្នាក់ បានស្លាប់បាត់បង់ជីវិត ខណៈបញ្ជូនទៅដល់មន្ទីរពេទ្យ និង៤នាក់ទៀត រងរបួសធ្ងន់ស្រាល ក្នុងហេតុការណ៍រវាងម៉ូតូនឹងម៉ូតូបុកគ្នាយ៉ាងពេញទំហឹង លាន់លឺដូចរន្ទះប៉ើងមនុស្សពាសពេញថ្នល់ នៅត្រង់ចំណុចភ្លើងស្តុបភូមិស្រះវង្ស សង្កាត់ស្វាយរៀង ក្រុងស្វាយរៀង ខេត្តស្វាយរៀង។ គ្រោះថ្នាក់ចរាចរណ៍នេះ កើតឡើងកាលពីវេលាម៉ោង១៖១៥នាទី រសៀលថ្ងៃទី១០ ខែធ្នូ ឆ្នាំ២០១៧។

ប្រជាពលរដ្ឋបានឃើញហេតុការណ៍ ប្រាប់ឲ្យដឹងថា នៅមុនពេលកើតហេតុ មានម៉ូតូពីរគ្រឿង មួយគ្រឿងម៉ាក ស្មាស់រីវ៉ូ ធ្វើដំណើរពីទិសខាងជើងមកត្បូង លុះមកដល់ចំណុចកើតហេតុខាងលើនោះ ជាកន្លែងភ្លើងស្តុប គឺភ្លើងក្រហម ហើយមិនបានឈប់ (មិនគោរពភ្លើងសញ្ញាចរាចរណ៍) បានបើកបន្តយ៉ាងលឿន ស្របពេលមានម៉ូតូមួយគ្រឿងទៀត ម៉ាក ហុងដាឌ្រីម ធុនសេ១២៥ ស៊េរីឆ្នាំ២០១៣ ទៅបុកម៉ូតូមកពីលិចទៅកើត ដែលធ្វើដំណើរចង់ឆ្លងផុតថ្នល់ហើយ បណ្តាលឲ្យដួលបីបួនត្រឡប់ពាសពេញផ្លូវសន្លប់ស្តូកស្តឹងតែម្តង។

សមត្ថកិច្ចឲ្យដឹងថា ភាគីម៉ូតូម៉ាក ហុងដាឌ្រីម បើកបរដោយឈ្មោះ ឆូយ រត័្ននា មានទីលំនៅនៅភូមិគយត្របែក សង្កាត់ស្វាយរៀង ក្រុងស្វាយរៀង និងអ្នករួមដំណើរឈ្មោះ ខែន តុលី អាយុ១៦ឆ្នាំ មុខរបរសិស្ស រស់នៅភូមិវាលយន្ត សង្កាត់/ក្រុងស្វាយរៀង (គ្មានមួកសុវត្ថិភាព) រងរបួសធ្ងន់ហូរឈាមតាមត្រចៀក។ រីឯខាងម៉តូស្មាស់វី បើកបរដោយឈ្មោះ សី ចាន់វឌ្ឍនៈ អាយុ១៨ឆ្នាំ រស់នៅភូមិអណ្តូងឫស្សី សង្កាត់ព្រៃឆ្លាក់ ក្រុងស្វាយរៀង ស្លាប់នៅមន្ទីរពេទ្យ និងអ្នករួមដំណើរមានឈ្មោះ វេង វិច្ចាមករា រស់នៅភូមិជាមួយអ្នកបើកបរ និងម្នាក់ទៀត បានគេចខ្លួនបាត់ទៅ។

ក្រោយពេលកើតហេតុ សមត្ថកិច្ចបានបញ្ជូនជនរងគ្រោះទៅមន្ទីរពេទ្យបង្អែកខេត្តស្វាយរៀង ដើម្បីសង្គ្រោះអាយុជីវិត ប៉ុន្តែអកុសលយុវជនម្នាក់ បានស្លាប់បាត់បង់ជីវិតនៅមន្ទីរពេទ្យ និងយុវជនម្នាក់ ត្រូវបានក្រុមគ្រួសារដឹកបញ្ជូនបន្តទៅមន្ទីរពេទ្យប្រទេសវៀតណាម ដោយសារសភាពធ្ងន់ធ្ងរពេក។ មធ្យោបាយទាំង២ សមត្ថកិច្ចយកទៅរក្សាទុកនៅស្នងការដ្ឋានខេត្តស្វាយរៀង រង់ចាំដោះស្រាយតាមនីតិវិធី៕

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post
Sponsor