ស្វាយរៀងៈ ជនជាតិចិនម្នាក់ ត្រូវបានគេប្រទះឃើញដេកស្លាប់ នៅក្នុងបន្ទប់ បង្កការភ្ញាក់ផ្អើល កាលពីថ្ងៃទី២៧ ខែធ្នូ ឆ្នាំ២០១៧ ស្ថិតនៅភោជនីដ្ឋានយីហោ ចានធំ ក្នុងផ្សារបាវិត(ម៉ុកបាយ) ក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង។
សមត្ថកិច្ច បានឲ្យដឹងថា សពបុរសជនជាតិចិនឈ្មោះ ចូវ ហង្ស ស៊ិង អាយុ៤៩ឆ្នាំ មានទីលំនៅខេត្តថាយតុង ប្រទេសចិន។ សមត្ថកិច្ចបន្តថា តាមការសន្និដ្ឋានពីគ្រូពេទ្យជំនាញ ដែលបានពិនិត្យសពឃើញថា ស្លាប់ដោយសារជំងឺប្រចាំកាយ មិនឃើញមានស្លាកស្នាម ជារឿងឃាតកម្មអ្វីនោះទេ។
បច្ចុប្បន្ន សាកសព សមត្ថកិច្ចរក្សាទុក រង់ចាំក្រុមគ្រួសារយកទៅធ្វើបុណ្យតាមប្រពៃណី៕
