កណ្ដាលៈ បុរសជាម្ចាស់ហាងកាហ្វេម្នាក់ ត្រូវសមត្ថកិច្ចចាប់ឃាត់ខ្លួនកាលពីថ្ងៃទី១៨ ខែធ្នូ ឆ្នាំ២០១៧ ក្រោយប៉ុនប៉ងចាប់រំលោភទៅលើនារីជាកម្មកររត់តុក្នុងហាងកាហ្វេរបស់ខ្លួន នៅចំណុចបន្ទប់គេងរបស់ក្មេងស្រីរងគ្រោះ ស្ថិតក្នុងភូមិព្រែករុន ឃុំព្រែកគយ ស្រុកស្អាង ខេត្តកណ្តាល។
ជនរងគ្រោះឈ្មោះ ស.ស.ណ ភេទស្រី អាយុ ២០ឆ្នាំ ជនជាតិខ្មែរ មុខរបរ អ្នករត់តុកាហ្វេ។ ចំណែកជនសង្ស័យឈ្មោះ អ៊ីវ វណ្ណា ភេទប្រុស អាយុ៣៥ឆ្នាំ ជនជាតិខ្មែរ មុខរបរ ម្ចាស់ហាងលក់កាហ្វេ មានទីលំនៅភូមិឃុំ កើតហេតុខាងលើ។
នារីរងគ្រោះ បានឲ្យដឹងថា នៅថ្ងៃទី១៧ ខែធ្នូ ឆ្នាំ២០១៧ វេលាម៉ោង៨យប់ ក្រោយពេលលក់កាហ្វេរួចជនសង្ស័យបានចូលដេកក្នុងបន្ទប់របស់ខ្លួន ចំណែកនារីរងគ្រោះ ក៏បានចូលបន្ទប់ដេករបស់ខ្លួនជាធម្មតា។ លុះវេលាម៉ោង១០យប ជនសង្ស័យបានចូលមកបន្ទប់លួងលោមស្ទាបអង្អែលនាង ដើម្បីរួមភេទ ប៉ុន្តែនាងមិនព្រម ទើបជនសង្ស័យបានចូលដេកបន្ទប់ខ្លួនវិញ។ រហូតដល់វេលាម៉ោង២ទៀបភ្លឺថ្ងៃទី១៨ ខែធ្នូ ឆ្នាំ២០១៧ ជនសង្ស័យបានចូលមកក្នុងបន្ទប់ជនរងគ្រោះលួងលោមម្តងទៀត ដោយបានដោះសម្លៀកបំពាក់ចេញពីខ្លួននាង រួចបានស្ទាបអង្អែលប្រដាប់ភេទ ដោយនាងមិនហ៊ានរើបម្រះឡើយ ពីព្រោះខ្លាចថៅកែរបស់ខ្លួន។ នារីរងគ្រោះ បន្តថា លុះព្រឹកឡើង នាងបានទូរសព្ទ័មកម្តាយរៀបរាប់អំពីរឿងហេតុខាងលើ ពេលឮដូចនោះ ម្ដាយនារីរងគ្រោះក៏បានទៅដាក់ពាក្យបណ្ដឹង។
ក្រោយទទួលបានពាក្យបណ្ដឹងភ្លាម សមត្ថកិច្ចផ្នែកព្រហ្មទណ្ឌស្រុក សហការជាមួយកម្លាំងប៉ុស្តិ៍រដ្ឋបាលព្រែកគយ បាននាំខ្លួនឈ្មោះ អ៊ីវ វណ្ណា មកធ្វើការសាកសួរ។ នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានស្ទាបអង្អែលប្រដាប់ភេទ ប៉ះពាល់រាងកាយនារីរងគ្រោះពិតប្រាកដមែន។
បច្ចុប្បន្នជនសង្ស័យបានឃាត់ខ្លួននៅអធិការរដ្ឋាននគរបាលស្រុកស្អាង ដើម្បីបន្ដអនុវត្តតាមនីតិវីធី៕
រីឯវត្ថុតាងចាប់យកមាន អាវយឺតដៃវែងពណ៌ក្រហម ចំនួន១, អាវយឺតពណ៌ខ្មៅ ចំនួន១, ខោជើងវែង ចំនួន១ (យឺត) និងខោទ្រនាប់ពណ៌ស ចំនួន១ ជារបស់ជនរងគ្រោះ ខោជើងខ្លីពណ៌សឆ្នូតខៀវ ចំនួន ១ ជារបស់ជនសង្ស័យ។
