កោះកុងៈ ប្រជាពលរដ្ឋបានប្រទះឃើញសាកសពមួយអណ្តែតទឹករសាត់មកអែបមាត់ច្រាំងនៃសមុទ្រក្បែរគល់ស្ពានស្រែអំបិល បង្កឱ្យមានការភ្ញាក់ផ្អើលកាលពីម៉ោង៤រសៀលថ្ងៃទី៩ ខែធ្នូ ឆ្នាំ២០១៧ ស្ថិតក្នុងភូមិសាលាម្នាង ឃុំស្រែអំបិល ស្រុកស្រែអំបិល ខេត្តកោះកុង។
អធិការនគរបាលស្រុកស្រែអំបិលលោកវរសេនីយ៍ឯក ម៉ា ទី បានដឹងនៅព្រឹកថ្ងៃទី១០ ធ្នូ ថា សពបុរសខាងលើ មានអាយុប្រហែល៣៥ឆ្នាំ បានស្លាប់ដោយលង់ទឹកច្រើនថ្ងៃមកហើយ ព្រោះសភាពសពឡើងហើមស្អុយ និងមិនមានស្លាកស្នាមអ្វីទាំងអស់នៅលើដងខ្លួន។
ហើយពេលនេះសពត្រូវបានសមត្ថកិច្ចស្រង់យកមករក្សាទុកនៅក្នុងវត្តស្រែអំបិល ដើម្បីរង់ចាំក្រុមគ្រួសារមកទទួលយក ព្រោះព័ត៌មានចុងក្រោយសមត្ថកិច្ចទទួលបានថា សពបុរសខាងលើមានក្រុមគ្រួសាររស់នៅខេត្តកំពង់ស្ពឺ ហើយជនរងគ្រោះជាមនុស្សវិកលចរិតទៀតផង៕
