នៅថ្ងៃទី០១ ខែធ្នូ ឆ្នាំ២០១៧ សមាគមរោងចក្រកាត់ដេរនៅកម្ពុជា GMAC បានចេញសេចក្តីថ្លែងការណ៍ ជម្រាបទៅអង្គការសហប្រជាជាតិ ស្ថានទូតបរទេសនានា សហភាពអឺរ៉ុប សហរដ្ឋអាមេរិក និងអ្នកបញ្ជាទិញថា៖ ស្ថានភាពនយោបាយកម្ពុជាបច្ចុប្បន្នមិនគួរត្រូវបានបកស្រាយឲ្យក្លាយទៅជាសកម្មភាពណាមួយដែលមានផលប៉ះពាល់អវិជ្ជមានមកលើវិស័យកាត់ដេរនេះទេ។
កម្មករជាង៧០ម៉ឺននាក់ ភាគច្រើនជាស្រ្តី និងប្រជាជនប្រមាណ២លាននាក់ទទួលបានផលប្រយោជន៍ពីវិស័យនេះ សមាគមរោងចក្រកាត់ដេរនៅកម្ពុជា អំពាវនាវឲ្យអ្នកបញ្ជាទិញអន្តរជាតិទាំងអស់ បន្តគាំទ្រកម្ពុជានិងរោងចក្រជាសមាជិក ដើម្បីសម្រេចគោលដៅសេដ្ឋកិច្ចដែលជាសុខមាលភាពរបស់ប្រជាពលរដ្ឋកម្ពុជា។ និយោជក កម្មករនិយោជិតទាំងអស់ ព្រមទាំងសហជីពបាននិងកំពុងធ្វើការងារធម្មតា និងសន្ដិភាពដើម្បីផ្គត់ផ្គង់ជីវភាពខ្លួនឯផ្ទាល់ និងសេដ្ឋកិច្ចកម្ពុជា។
សេចក្តីថ្លែងការណ៍បន្ថែមទៀតថា កម្មករមានសេចក្តីរីករាយចំពោះការទទួលបានអត្ថប្រយោជន៍ផ្សេងៗពីរដ្ឋាភិបាលនិងនិយោជក ដូចជា ការគាំពារសុខភាព គម្រោងសោធននិវត្តន៍ ថ្លៃផ្ទះជួល និងការដំឡើងប្រាក់ឈ្នួល១៧០ដុល្លារនៅឆ្នាំក្រោយ។
សមាគមអំពាវនាវដល់អ្នកបញ្ជាទិញអន្តរជាតិទាំងអស់បន្តគាំទ្រកម្ពុជា និងរោងចក្រសហគ្រាសរបស់សមាគមដើម្បីសម្រេចគោលដៅសេដ្ឋកិច្ចរបស់យើងដែលជាសុខុមាលភាពប្រសើរឡើងរបស់ប្រជាពលរដ្ឋកម្ពុជាទាំងអស់។
មួយរយៈចុងក្រោយនេះ សហភាពអឺរ៉ុប សហរដ្ឋអាមេរិក និងប្រទេសលោកសេរីមួយចំនួន បានព្រមានដាក់ទណ្ឌកម្មលើកម្ពុជា ក្រោយមានការរំលាយគណបក្សប្រឆាំងដ៏ធំ កាលពីពេលថ្មីៗនេះ។
