ភ្នំពេញៈ កម្លាំងប្រតិបត្តិការពិសេស នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម បានចុះបិទតូបមួយកន្លែង នៅក្នុងផ្សារអូរឫស្សី នារសៀលថ្ងៃទី២ ខែធ្នូ ឆ្នាំ២០១៧ ដែលទទួលទិញពោះវៀនសត្វគ្រប់ប្រភេទជាផលិតផលសម្រេច សម្រាប់យកទៅច្រកសាច់ក្រក ដែលប្រើសារធាតុគីមី និងគ្មានច្បាប់អនុញ្ញាត ជាហេតុបង្កផលប៉ះពាល់ដល់សុខភាពពលរដ្ឋ។
ប្រតិបត្តិការនេះ ដឹកនាំដោយឧត្តមសេនីយ៍ត្រី ទូច យុទ្ធា និងឧត្តមសេនីយ៍ ទូច គង្គា ប្រធាន អនុប្រធានក្រុមប្រតិបត្តិការពិសេស នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម និងសម្របសម្រួលដោយលោក សឿ ឡងឌី ព្រះរាជអាជ្ញារងនៃអយ្យការអមសាលាដំបូងខេត្តកំពង់ស្ពឺ។
សមត្ថកិច្ចបានឲ្យដឹងថា ម្ចាស់តូបដែលបានទទួលទិញពោះវៀនសត្វ ដែលផលិតគ្មានស្តង់ដារ យកមកច្រកសាច់ក្រកនេះ ឈ្មោះ វីង ហួរ ហើយត្រូវបានបិទតូប ផ្អាកអាជីវកម្មមួយរយៈ រង់ចាំការបន្តនីតិវិធី។
គួរបញ្ជាក់ថា យ៉ាងតិច គឺមានរយៈពេល៣ឆ្នាំមកហើយ ពោះវៀនសត្វគ្រប់ប្រភេទ ត្រូវបានឈ្មួញនាំចូលតាមច្រកអន្តរជាតិកំពង់ផែស្វយ័តក្រុងព្រះសីហនុ ដោយប្រើរថយន្តកុងតឺន័រ ជាមធ្យោបាយដឹកជញ្ជូនយ៉ាងអនាធិបតេយ្យ ដើម្បីយកមកផលិតច្រកសាច់ក្រក ក៏ដូចជាច្រកសាច់ប៉ាតេនេះជាដើម។
គួររំលឹកថា កាលពីរសៀលថ្ងៃទី២៩ ខែវិច្ឆិកា ឆ្នាំ២០១៧ ពោះវៀនសត្វគ្រប់ប្រភេទ មានចំនួនរាប់សិបតោន យកមកទុកនៅទីតាំងដីទំហំជិត៣ហិកតា ស្ថិតក្នុងភូមិថ្មីពីងពុង ឃុំដំណាក់រាំង ស្រុកឧដុង្គ ខេត្តកំពង់ស្ពឺ ត្រូវបានសមត្ថកិច្ចជំនាញ ចុះបង្ក្រាបជាក់ស្តែង ដោយបានរកឃើញពោះវៀនសត្វគ្រប់ប្រភេទ ទាំងផលិតរួច ទាំងស្អុយរលួយ ទាំងដាក់សារធាតុគីមី ជាមួយនឹងស្រោមដាក់សាច់ប៉ាតេ សុទ្ធតែជាអំពើល្មើសច្បាប់ និងប៉ះពាល់សុខភាពយ៉ាងធ្ងន់ធ្ងរដល់ប្រជាពលរដ្ឋដែលជាអ្នកបរិភោគ។
ទាក់ទិនទៅនឹងអំពើល្មើសច្បាប់នេះ សមត្ថកិច្ចជំនាញក៏បានអំពាវនាវឲ្យប្រជាពលរដ្ឋមានការប្រុងប្រយ័ត្នឲ្យបានខ្ពស់ ចំពោះការទិញគ្រឿងឧបភោគ បរិភោគ ក៏ដូចជាចំណីអាហារមានជាតិពុល ក្នុងនោះ មេត្តាជួយផ្តល់ព័ត៌មានពីទីតាំងសិប្បកម្មខុសច្បាប់ ទីតាំងផលិតអាហារមានជាតិពុល ក្នុងប្រយោជន៍ ដើម្បីការពារសុខុមាលភាពជូនបងប្អូនប្រជាពលរដ្ឋ ក្នុងក្របខណ្ឌទូទាំងប្រទេស ក៏ដូចជាភ្ញៀវអន្តរជាតិ មកទេសចរណ៍កម្សាន្ត ឬបំពេញការងារផ្សេងៗនៅក្នុងប្រទេសយើង ជៀសវាងប៉ះពាល់សុខភាព។
ចំពោះករណីនាំចូលពោះវៀនសត្វគ្រប់ប្រភេទនេះ មិនត្រឹមតែជាការទទួលខុសត្រូវសម្រាប់ជំនាញកាំកុងត្រូលប្រចាំច្រកនោះទេ តាមច្បាប់សមត្ថកិច្ចស្ថាប័ន ដែលមាននៅក្នុងអនុក្រឹត្យដូចជានគរបាលអន្តោប្រវេសន៍ គយ និងរដ្ឋាករ សុទ្ធតែទទួលខុសត្រូវនូវអំពើល្មើសច្បាប់នេះ ដូចជាខាងកាំកុងត្រូលនោះដែរ ខណៈ ការដឹកជញ្ជូននេះប្រើសុទ្ធតែរថយន្តកុងតឺន័រ ក៏ដូចជាឆ្លងកាត់ការបំពេញលិខិតស្នាមប្រតិវេទន៍គយ និងការត្រួតពិនិត្យដោយសមត្ថកិច្ចជំនាញ ដូច្នេះ បើគ្មានអំពើឃុបឃិតគ្នាជាលក្ខណៈប្រព័ន្ធនោះទេ ការហូរចូលពោះវៀនសត្វគ្រប់ប្រភេទនេះ មិនអាចមកដោយរលូនបានឡើយ៕
