ភ្មំពេញៈ មិនដឹងថាផលិតកម្ម ថោន មានចេតនាឲ្យបទចម្រៀងមួយនេះផ្ទុះ ក្រោយដឹងថា មួយរយៈនេះ បទចម្រៀងរបស់ខ្លួនស្ងាត់ឬយ៉ាងណា ឬក៏ចង់បង្ហាញជ្រុងមួយរបស់គ្រូ បានជានិពន្ធចម្រៀងបែបនេះ ចេញមកវាយប្រហារគ្រូទាំងដឹងថា គ្រូ១ថ្ងៃ គ្រូមួយជីវិត។
ចម្រៀងនេះមានខ្លឹមសារឡើងភ្លៀវ ខណៈអ្នកនិពន្ធបទនេះ មិនមែនរួមចំណែកជួយសង្គមទេ តែជាគំនិតដាស់តឿនឲ្យសិស្សភ្លេចគុណគ្រូទៅវិញ ការនិពន្ធបទបែបនេះ ប៉ះពាល់ខ្លាំងណាស់ ដល់ទឹកចិត្តគ្រូបង្រៀនទូទៅ ដែលពួកគាត់ខំប្រឹងប្រែងបង្រៀនសិស្សអស់ទាំងចិត្ត និងកាយ។ សួរមួយលោកអ្នកនិពន្ធ តើលោកអាចរាប់ឈ្មោះគ្រូរបស់លោក ដែលបានបង្ហាត់បង្រៀនឲ្យលោកចេះនិពន្ធមកដល់ថ្ងៃនឹងអស់ទេ? មិនបានសងគុណពួកគាត់ សូមកុំរកនឹកចំណុចអាក្រក់១លើ១លានមកធ្វើឲ្យប៉ះពាល់ដល់ទឹកចិត្តគ្រូបង្រៀនទូទាំងប្រទេស។
បើលោកមិនគោរព មិនដឹងគុណគ្រូរបស់លោកកុំបង្វក់កូនខ្មែរ ឲ្យមិនស្គាល់ពីតម្លៃរបស់គ្រូបង្រៀនតាមរយៈបទចម្រៀង។ សុំទោសដែលសរសេរអារម្មណ៍ពិត។
បទចម្រៀងថ្មី ដែលលេចចេញការរិះគន់ ត្រូវបានផលិតកម្មថោន បញ្ចេញកាលពីចុងសប្តាហ៍នេះ នៅលើគេទំព័រហ្វេសប៊ុករបស់ខ្លួន។ ក្រោយការបញ្ចេញគេឃើញមានការរិះគន់ជាច្រើនថា បទចម្រៀងនេះមានអត្ថន័យ បន្ទាបតម្លៃគ្រូបង្រៀនទៅវិញ បើទោះបីជាបទចម្រៀងនេះ ចង់ឲ្យគ្រូបង្រៀនគោរពតាមក្រមសីលធម៌វិជ្ជាជីវៈក្តី។ អ្នកនិពន្ធសម័យថ្មីបាននិពន្ធបទចម្រៀងមួយបទ ដែលមានចំណងជើងថា «គ្រូបង្រៀនស្រវឹងស្រា» ដែលក្នុងខ្លឹមសារនោះ បញ្ជាក់ថា «ឲ្យតែស្រវឹង គ្រូកាចចម្លែក បង្រៀនប្លែកៗ ខឹងស្រែក ខឹងវាយ» ដែលក្នុងន័យនេះ គឺហាក់ដូចជាមើលស្រាលចំពោះគ្រូបង្រៀនបន្តិចហើយ៕
