ភ្នំពេញៈ របងសាលាបឋមសិក្សាអ្នកឧកញ៉ាមហាភក្តី ហ៊ុន នាង បឹងត្របែកខាងត្បូង រងនូវការខូចខាតយ៉ាងដំណំ ដោយកាលពីវេលាម៉ោង២៖៤៥នាទី រំលងអធ្រាត្រឈានចូលថ្ងៃព្រហស្បតិ៍ ៣កើត ខែបុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២១ ខែធ្នូ ឆ្នាំ២០១៧ នៅចំណុចផ្លូវលេខ៤៣០ កែងនឹងផ្លូវលេខ៥១២ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ មានរថយន្ត១គ្រឿងម៉ាក កាមរី ហាយប៊្រីដ បុកទម្លុះរបងសាលា តែមិនបណ្តាលឲ្យរងរបួសដល់អាយុជីវិតមនុស្សឡើយ។
ប្រភពពីសាក្សីនៅកន្លែងកើតហេតុ បានប្រាប់ថា រថយន្តបង្កហេតុ ធ្វើដំណើរពីកើតមកយ៉ាងលឿន ដោយមិនបន្ថយល្បឿនត្រង់ចំណុចផ្លូវកោង ហេតុដូច្នេះមិនទាញចង្កូតទាន់ក៏ជ្រុលទៅបុករបងសាលាលាន់ដូចរន្ទះ ធ្វើប្រជាពលរដ្ឋភ្ញាក់ពីដំណេករត់ចេញពីក្នុងផ្ទះចេញមកចោមរោមមើល ក៏បានឃើញអ្នកបើកបររថយន្ត រត់ចេញពីក្នុងរបងសាលាជិះម៉ូតូឌុបទៅបាត់។
ប្រភពពីអ្នករត់ម៉ូតូឌុបម្នាក់ ឲ្យដឹងថា នៅមុនពេលកើតហេតុ គេបានឃើញរថយន្ដបង្ក ទើបតែចេញពីហាងផឹកស៊ីខារ៉ាអូខេភ្នំមាស និងបើកបរក្នុងល្បឿនលឿនទៀតផង លុះពេលគាត់ដឹកមូយមកតាមក្រោយ ក៏ឃើញរថយន្ដនេះ ជួបគ្រោះថ្នាក់ចរាចរណ៍តែម្ដង។
សមត្ថកិច្ចប្រាប់ថា រថយន្តបង្កហេតុម៉ាក កាមរីហាយប៊្រីដ ស៊េរីឆ្នាំ២០០៧ ពណ៌ខ្មៅ ពាក់ស្លាកលេខ ភ្នំពេញ 2T-5253។ សមត្ថកិច្ចបន្តថា ក្រោយកើតហេតុ អ្នកបើកបររត់បាត់ បន្សល់ទុករថយន្តនៅកន្លែងកើតហេតុ ក៏ប៉ុន្តែមានបុរសម្នាក់ បានចេញមុខដោះស្រាយជាមួយភាគីនាយកសាលា ក្នុងគោលបំណងសាងសង់របងសាលាឡើងវិញ ហើយសុំយករថយន្តបង្កហេតុទៅធ្វើការជួសជុល។
ទោះបីយ៉ាងនេះក្តី សមត្ថកិច្ចមិនអនុញ្ញាតឲ្យយករថយន្តចេញពីកន្លែងកើតហេតុនោះទេ គឺរង់ចាំមានការសម្របសម្រួលពីខាងភាគីនាយកសាលាជាមុនសិន៕
