ភ្នំពេញៈ ស្រ្តីជាអ្នកលក់ទឹកក្រឡុកដ៏មានប្រជាប្រិយភាព រួមនឹងកូនក្នុងផ្ទៃពោះ៥ខែ ត្រូវចរន្តអគ្គិសនីឆក់ស្លាប់យ៉ាងអាណោចអាធ័មបំផុត ក្រោយពីស្រ្តីរូបនេះដើរទៅដោតឌុយភ្លើងរទេះលក់ ស្រាប់តែជាន់ចំមុខតំណរខ្សែភ្លើងឆក់ស្លាប់តែម្ដង។
រឿងដ៏គួរឲ្យខ្លោចផ្សារចិត្តនេះ បានកើតឡើងកាលពីវេលាម៉ោង៧និង១០នាទីយប់ ថ្ងៃ៣កើត ខែបុស្ស នព្វស័ក ព.ស២៥៦១ ត្រូវនិងថ្ងៃទី២០ ខែឆ្នូ ឆ្នាំ២០១៧ នៅចំណុចផ្ទះលក់ម្ជូរ និងទឹកក្រឡុក សៀវ មិញ ជិតផ្ទះសំណាក់ណារី ផ្លូវជាតិលេខ២ ស្ថិតក្នងភូមិព្រែកតានូ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
អ្នកមើលថែកូន ឲ្យស្ត្រីរងគ្រោះ បានដឹងថា មុនពេលកើតហេតុ កូនប្រុសរបស់ស្ត្រីរងគ្រោះ ត្រូវរទេះលក់ទឹកក្រឡុកគៀបជើង ស្ត្រីរងគ្រោះក៏បានទៅមើល ហើយក៏នាំកូនចូលក្នុងផ្ទះ រួចក៏ត្រឡប់មកកន្លែងដាក់លក់រទេះលក់ម្ជូរវិញ ដោយមិនបានចាប់អារម្មណ៍ ស្ត្រីរងគ្រោះក៏បានដើរទៅដោតឌុយ ដើម្បីបើកភ្លើងរទេះលក់ម្ជូរ និងកន្លែងលក់ដូចរាល់ថ្ងៃ ស្រាប់តែជាន់ចំមុខខ្សែភ្លើង ឆក់ដួលនៅកន្លែងកើតហេតុ បង្កការភ្ញាក់ផ្អើលស្រែកឆោរឡោឡើងតែម្ដង។ ភ្លាមៗនោះក្រុមគ្រួសារក៏បានដឹកទៅមន្ទីរពេទ្យដើម្បីជួយសង្គ្រោះ តែជាអកុសលពេលទៅដល់មន្ទីរពេទ្យ ក្រុមគ្រូពេទ្យប្រាប់ថា ស្ត្រីរងគ្រោះបានស្លាប់ មុនពេលបញ្ចូលទៅមន្ទីរពេទ្យម៉្លេះ។
ស្ត្រីរងគ្រោះឈ្មោះ សុខុម លីនដា អាយុ២៩ឆ្នាំ មុខរបរលក់ទឹកក្រឡុក បង្អែមផ្លែឈើ និងម្ជូរ និងប្ដីឈ្មោះ យ៉ុង រៃយ៉ា ជាអ្នកបញ្ចូលបទភ្លេង ព្រមទាំងមានកូនប្រុស២នាក់ក្នុងបន្ទក និងកូនក្នុងផ្ទៃអាយុ៦ខែជាងម្នាក់ទៀត។
បច្ចុប្បន្នសព ត្រូវបានក្រុមគ្រួសារកំពុងតែធ្វើបុណ្យតាមប្រពៃណីនៅផ្ទះកើតហេតុ៕
