នៅថ្ងៃទី១០ ខែធ្នូ ឆ្នាំ២០១៧ ត្រូវនឹងទិវសិទ្ធិមនុស្សអន្តរជាតិ លោក សម រង្ស៊ី អតីប្រធានគណបក្សសង្គ្រោះជាតិបានបើកកិច្ចប្រជុំនៅទីក្រុងលីយ៉ុង ប្រទេសបារាំង ដែលមានការចូលរួមពីព្រះសង្ឃ ប្រជាពលរដ្ឋរស់នៅប្រទេសបារាំង។ ថ្លែងក្នុងកិច្ចប្រជុំនោះ លោក សម រង្ស៊ី ថ្លែងថា៖ សុំប្រកាសថា លោក ហ៊ុន សែន គាត់រំលាយគណបក្សសង្គ្រោះជាតិតែលើក្រដាសទេ គណបក្សសង្គ្រោះជាតិនៅរស់រវើកក្នុងឌួងចិត្តប្រជារាស្រ្តខ្មែរទាំងមូល ហើយគណបក្សសង្គ្រោះជាតិនឹងដណ្តើមយកជ័យជម្នះ ដើម្បីនាំមកនូវការផ្លាស់ប្តូរឱ្យទាល់តែបាននៅប្រទេសកម្ពុជា។
ដោយឡែក នៅមុខសេតវិមាន សហរដ្ឋអាមេរិកវិញ មានការជួបជុំដើម្បីធ្វើបាតុកម្ម ដោយមានការដឹកនាំដោយមន្ត្រីជាន់ខ្ពស់អតីតគណបក្សសង្គ្រោះជាតិដូចជា លោក យ៉ែម បុញ្ញឫទ្ធិ លោក អ៊េង ឆៃអ៊ាង ក៏មានវត្តមាន ព្រះតេជគុណ ប៊ុត ប៊ុនតិញ អតីតប្រធានចលនាព្រះសង្ឃរាជ្យដើម្បីប្រជាធិបតេយ្យ និងមានការចូលរួមពីបងប្អូនប្រជាពលរដ្ឋកំពុងរស់នៅសហរដ្ឋអាមេរិកជាច្រើននាក់ផងដែរ។
គោលបំណងនៃបាតុកម្មនេះ ទាមទារឱ្យដោះលែងលោក កឹម សុខា ដោះលែងអ្នកទោសនយោបាយ ដោយគ្មានលក្ខខណ្ឌព្រះតេជគុណ ប៊ុត ប៊ុនតិញ មានព្រះសង្ឃដីការក្នុងបាតុកម្មនោះថា៖ លោក ហ៊ុន សែន កំពុងតែភ័យ ភ័យរហូតភ្លេចគិតរឿងត្រឹមត្រូវ បន្ទាប់ពីតុលាការកំពូលបានរំលាយ គណបក្សសង្គ្រោះជាតិ សូម្បីតែសាច់ញាតិរបស់គាត់ក៏ចង់សម្លាប់ចោលដែរ។
ព្រះតេជគុណព្រះសង្ឃដីការបន្ថែមថា លោក ហ៊ុន សែន ភ័យនឹងការគ្រប់គ្រងស្ថានភាពបច្ចុប្បន្ន ភ័យនឹងសម្ពាធអន្តរជាតិ ភ័យនឹងការងើបតវ៉ារបស់កម្មករ។
