យោងតាមសេចក្តីជូនដំណឹងរបស់ក្រសួងការបរទេសនិងសហប្រតិបត្តិការអន្តរជាតិ នៃព្រះរាជាណាចក្រកម្ពុជា ចុះថ្ងៃទី១៩ ខែធ្នូ ឆ្នាំ២០១៧ បានឲ្យដឹងថា នៅព្រឹកថ្ងៃទី២០ ខែធ្នូ ឆ្នាំ២០១៧ នាម៉ោង០៩និ៣០នាទី នៅទីស្នាក់ការក្រសួង ឯកឧត្តម ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រ និងលោក HORINOUCHI Hidehisa ឯកអគ្គរាជទូតជប៉ុនប្រចាំកម្ពុជានឹងអញ្ជើញចុះហត្ថលេខា លើលិខិតប្តូរសារ និងកំណត់ហេតុនៃការពិភាក្សា ស្តីពីការផ្តល់ជំនួយហិរញ្ញប្បទាន ឥតសំណង នូវទឹកប្រាក់ប្រមាណជា ២៨លានដុល្លារ (៣១៧០លានយ៉េន)។
បើតាមសេចក្តីជូនដំណឹងដដែលនេះ បានឱ្យដឹងទៀតថា ទឹកប្រាក់ប្រមាណជា២៨លានដុល្លារអាមេរិក (៣១៧០លានយ៉េន) នេះ សម្រាប់អនុវត្តគម្រោងសាងសង់វិទ្យាស្ថានគរុកោសល្យ នៅរាជធានីភ្នំពេញ និងខេត្តបាត់ដំបង។
ហិរញ្ញប្បទានឥតសំណងនេះ ត្រូវបានផ្តល់ជូនរាជរដ្ឋាភិបាលកម្ពុជា ដោយរដ្ឋាភិបាលជប៉ុន ដើម្បីលើកកម្ពស់សមត្ថភាព ធនធានមនុស្សកម្ពុជា ក្នុងការឆ្លើយតបនឹងតម្រូវការអភិវឌ្ឍ សេដ្ឋកិច្ច-សង្គមរបស់ជាតិ៕
