សៀមរាបៈ នារីបម្រើការងារនៅហាងខារ៉ាអូខេម្នាក់ ទំនងជាតូចចិត្តនឹងក្រុមគ្រួសារ និងសង្សារស្តីបន្ទោសរឿងនាងធ្វើការនៅកន្លែងមិនសមរម្យ(ហាងខារ៉ាអូខេ) បានសរសេរសំបុត្រទុកជាបណ្តាំមួយច្បាប់ រួចបានធ្វើអត្តឃាតចងកសម្លាប់ខ្លួននៅក្នុងបន្ទប់ដេករបស់នាង ស្លាប់ទាំងនៅវ័យក្មេងខ្ចី។
ហេតុការណ៍នេះ បង្កការភ្ញាក់ផ្អើលកាលពីវេលាម៉ោង១០ និង២៥នាទីព្រឹក ថ្ងៃអង្គារ ២កើត ខែបុស្ស ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១៩ ខែធ្នូ ឆ្នាំ២០១៧ ស្ថិតនៅចំណុចក្រុមទី១ ភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប ។
សមត្ថកិច្ចនគរបាលក្រុងសៀមរាបបានឲ្យដឹងថា នារីរងគ្រោះឈ្មោះ នន សារ៉ុម អាយុ២២ឆ្នាំ មុខរបរបុគ្គលិកបម្រើការងារនៅហាងខារ៉ាអូខេ ព្រីមមា មានស្រុកកំណើតភូមិអូរសំបួរ ឃុំក្តីដូង ស្រុកស្ទឹងសែន ខេត្តកំពង់ធំ បច្ចុប្បន្នស្នាក់នៅបន្ទប់ជួល ក្នុងភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប បានចងកធ្វើអត្តឃាតនឹងក្រមាពណ៌ក្រហមលាយស ទៅនឹងចម្រឹងបង្អួច បន្ទប់ដេករបស់នាង មានកម្ពស់២ម៉ែត្រ ពីឥដ្ឋ។
សមត្ថកិច្ចបានឲ្យដឹងទៀតថា នៅក្នុងបន្ទប់ដេករបស់ស្រ្តីរងគ្រោះ គេបានរកឃើញលិខិតមួយច្បាប់សរសេរដោយផ្ទាល់ដៃនារីរងគ្រោះតែម្តង ដោយបានរៀបរាប់ប្រាប់ ក្រុមគ្រួសារ និងសង្សាររបស់នាង នូវការមានវិប្បដិសារីរបស់ខ្លួន ដែលមិនអាចធ្វើជាប្អូនស្រីល្អរបស់គ្រួសារនេះ ដោយសារតែនាងម្នាក់ធ្វើឲ្យក្រុមគ្រួសារខ្មាសគេ សូមបំភ្លេចនាងចោលចុះ។ ជីវិតដែលគ្មានភាពកក់ក្តៅ គ្មានអ្នកស្រលាញ់ ដឹងថាឯកា ខ្ញុំមិនចង់រស់ទេ បើមានជាតិក្រោយមែនសូមឲ្យក្លាយជាទឹក និងខ្យល់ កុំកើតជាមនុស្សអី។ ការរៀបរាប់នេះ បានសបញ្ជាក់ឲ្យដឹងថា នាងមានវិបត្តិផ្លូវចិត្តក្នុងគ្រួសារ និងសង្សាររបស់នាងតែម្តង ទើបនាងដាច់ចិត្តបញ្ចប់ជីវិតទាំងវ័យក្មេងខ្ចីបែបនេះ។
ក្រោយពីទទួលព័ត៌មានមានករណីធ្វើអត្តឃាតនេះភ្លាម សមត្ថកិច្ចជំនាញបានទៅដល់ ធ្វើកោសល្យវិច័យ ហើយសន្និដ្ឋានថា នារីរងគ្រោះពិតជាស្លាប់ដោយការធ្វើអត្តឃាតចងកសម្លាប់ខ្លួនប្រាកដមែន គឺគ្មានស្នាកស្នាមពាក់ពន្ធនឹងបទល្មើសព្រហ្មទណ្ឌឡើយ ។
បច្ចុប្បន្ន សមត្ថកិច្ចបានប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី៕
