ក្នុងឱកាសបើកដំណើរការជើងហោះហើរថ្មី ដាឡាត់ - បាងកក ក្រុមហ៊ុនអាកាសចរណ៍វៀតណាម VietJet Air សម្រេចចិត្តយកស្រីស្អាតសាច់សខ្ចី ស្លៀកឈុតប៊ីគីនី អមជាមួយការរចនាផ្កាដ៏ស្រស់ស្អាត មកដើរបង្ហាញម៉ូដ នៅលើជើងហោះហើរ ដើម្បីបង្កើតបរិយាកាសរីករាយដល់អ្នកដំណើរ ក៏ដូចជាអតិថិជនរបស់ VietJet Air ។
កម្មវិធីរបស់ក្រុមហ៊ុនអាកាសចរណ៍វៀតណាម VietJet Air នេះ បានធ្វើឱ្យអ្នកដំណើរជាច្រើន មានការភ្ញាក់ផ្អើលយ៉ាងខ្លាំង នៅលើជើងហោះហើរពីទីក្រុងបាងកក ប្រទេសថៃ ទៅកាន់ទីក្រុង Dalat ប្រទេសវៀតណាម។ ការបង្ហាញម៉ូដប៊ីគីនីរបស់ស្រីស្អាតវៀតណាមនេះ បានចាប់ផ្ដើមកាលពីថ្ងៃច័ន្ទ ដោយនារីស្អាតៗជាច្រើននាក់ ស្លៀកឈុតប៊ីគីនី មករាំពត់ពេនតាមចង្វាក់ម៉ូដែល ក្បែរៗខ្លួនភ្ញៀវយន្ដហោះ។
មន្ត្រីក្រុមហ៊ុន VietJet Air បានឲ្យដឹងថា ការដើរបង្ហាញម៉ូដនេះធ្វើឡើងក្នុងគោលបំណង លើកកម្ពស់ទីក្រុង Dalat ដែលត្រូវបានគេស្គាល់តាមរយៈ សម្រស់សួនផ្កាដ៏ស្រស់ស្អាត និងធ្វើឱ្យគេចងចាំមិនភ្លេចថែមទៀត គឺស្រីស្អាតលើយន្ដហោះ។
គួរបញ្ជាក់ថា ក្រុមហ៊ុនអាកាសចរណ៍ VietJet Air នេះ ធ្លាប់បានធ្វើឲ្យគេភ្ញាក់ផ្អើលម្ដងរួចមកហើយ កាលពីឆ្នាំ២០១៤ ដោយសារតែការផ្សព្វផ្សាយ ដំណឹងផ្សេងៗ គេប្រើអ្នកបម្រើស្រីលើយន្តហោះស្លៀកឈុតប៊ីគីនីសិចស៊ី ដើរផ្សាយដំណឹងលើយន្ដហោះ៕
