ខេត្តកំពង់ធំ៖ នៅរសៀលថ្ងៃអង្គារ ០៩រោច ខែមិគសិរ ឆ្នាំរកា នព្វស័ក ព. ស២៥៦១ ត្រូវនឹងថ្ងៃទី១២ ខែធ្នូ ម្សិលមិញ បវរកញ្ញាសាកលវិទ្យាល័យពិភពលោក ចំនួន៨៤ប្រទេស ៨៤រូប (រួមទាំងកម្ពុជា) បានចូលទស្សនាប្រាសាទសំបូរព្រៃគុក ខេត្តកំពង់ធំ ដើម្បីសិក្សាស្វែងយល់ និងផ្សព្វផ្សាយ ពីសក្តានុពលទេសចរណ៍ វប្បធម៌ ទៅកាន់សាកលលោក។
វត្តមានរបស់កំពូលស្រីស្អាតប្រចាំសាកលវិទ្យាល័យនៅជុំវិញពិភពលោកនេះ នឹងធ្វើឲ្យកម្ពុជាកាន់តែមានកេរ្តិ៍ឈ្មោះល្បីល្បាញបន្ថែមទៀត ពិសេសតំបន់ទេសចរណ៍ដ៏មានសក្តានុពលរបស់កម្ពុជា ទាំងតំបន់វប្បធម៌ ប្រវត្តិសាស្រ្តនិងធម្មជាតិ បន្ទាប់ពីខែមុនបវរកញ្ញាពិភពលោកក៏បានអញ្ជើញទស្សនានៅតំបន់ទេសចរណ៍វប្បធម៌ និងដំាដើមឈើនៅក្នុងទឹកដីសុវណ្ណភូមិមួយនេះផងដែរ។
គួររម្លឹកផងដែរថា រមណីយដ្ឋានប្រាសាទសំបូរព្រៃគុក ដែលបាននឹងកំពុងបង្អួតសោភ័ណភាពដ៏ស្រស់ត្រកាលរបស់ខ្លួន ទៅកាន់ពិភពលោកជាថ្មីម្ដងទៀត ត្រូវបានដាក់បញ្ចូលក្នុងបញ្ជីបេតិកភណ្ឌពិភពលោកបានដោយជោគជ័យ កាលពីថ្ងៃទី០៨ ខែកក្កដា ឆ្នាំ២០១៧ កន្លងទៅ។ ប្រភព ៖ មន្ទីរទេសចរណ៍ខេត្តកំពង់ធំ
