ភ្នំពេញៈ តុលាការកំពូលនៅព្រឹកថ្ងៃទី១០ ខែមករា ឆ្នាំ២០១៨ ស្អែកនេះ នឹងបើកសវនាការកាត់ទោសលោក គឹម សុខ អ្នកឃ្លាំមើលកិច្ចការសង្គម និងនយោបាយ ដែលបានប្ដឹងសារទុក្ខមិនសុខចិត្ត និងសេចក្ដីសម្រេចរបស់តុលាការថ្នាក់ក្រោម ដែលបានផ្ដន្ទាទោសគាត់ឲ្យជាប់ពន្ធនាគារ១៨ខែ។
សវនាការនៅតុលាការកំពូលនេះមានចៅក្រម៥រូប ដឹកនាំដោយលោកស្រី គិម សត្ថាវី ជាប្រធានក្រុមប្រឹក្សាជំនុំជម្រះ និង លោក ឈួន ចាន់ថា ជាតំណាងមហាអយ្យការអមតុលាការកំពូល។
សូមរំឭកថា លោក គឹម សុខ ធ្លាប់ត្រូវបានសាលាដំបូងរាជធានីភ្នំពេញ បានកាត់ទោសរូបគាត់ តែក្នុងពេលសវនាការជនជាប់ចោទបានបដិសេធមិនឆ្លើយ និងសំណួររបស់តុលាការ ព្រមទាំងបង្ហាញ ឫកពាក្រអឺតក្រទម ហើយក៏ត្រូវបានចៅក្រមសាលាដំបូង និងសាលាឧទ្ធរណ៍ សម្រេចដូចគ្នាឱ្យជាប់ពន្ធនាគាររយៈពេល១៨ខែ ពិន័យជាប្រាក់ចំនួន៨លានរៀល និងសងសំណងជំងឺចិត្តដល់សម្តេចតេជោនាយករដ្ឋមន្ត្រីជាដើមបណ្ដឹងរដ្ឋប្បវេណី ចំនួន៨០០លានរៀល ក្រោមការចោទប្រកាន់ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទបរិហារកេរ្តិ៍ជាសាធារណៈ តាមមាត្រា៤៩៤ មាត្រា៤៩៥ និង មាត្រា៣០៥ នៃក្រមព្រហ្មទណ្ឌ ។
ពាក់ព័ន្ធករណីនេះអ្នកច្បាប់មួយចំនួនមានការមន្ទិលសង្ស័យថា ការកាត់ទោសកន្លងមក ជនជាប់ចោទបដិសេធមិនឆ្លើយ និងសំណួររបស់តុលាការទេ តែក្រោយពេលតុលាការប្រកាសសាលក្រមជនជាប់ចោទតែងតែប្ដឹងជំទាស់ និងសេចក្ដីសម្រេចរបស់តុលាការថ្នាក់ ក្រោមរហូតមក ទើបរឿងក្ដីនេះឡើងមកដល់តុលាការកំពូល តើការប្ដឹងបែបនេះមានប្រយោជន៍អ្វីដល់ជនត្រូវចោទ បើគាត់មិនឆ្លើយនិងសំណួរតុលាការដដែលនោះ ៕
