ភ្នំពេញៈ ជនសង្ស័យម្នាក់ ក្នុងចំណោមបក្ខពួក២នាក់ ត្រូវបានកម្លាំងសមត្ថកិច្ចប៉ុស្តិ៍នគរបាលស្ទឹងមានជ័យ៣ ឃាត់ខ្លួនយកទៅសាកសួរ បន្ទាប់ពី ជនសង្ស័យទាំងនោះ បានធ្វើសកម្មភាពលួចយកម៉ូតូម៉ាក ស៊ុយសុគីនិច មួយគ្រឿងរបស់ស្ត្រីជាជនរងគ្រោះម្នាក់ ដែលទុកនៅមុខផ្ទះ បានសម្រេច។ ហេតុការណ៍ឃាត់ខ្លួននេះ បានធ្វើឡើងនៅវេលាម៉ោង១១៖៣០នាទី ថ្ងៃទី២៨ ខែមករា ឆ្នាំ២០១៨ ទុលមុខនឹងឱសថស្ថាន ប៉ោសារិន ម្តុំសេះស ផ្ទះ៣០ម៉ែត្រ ភូមិដំណាក់ធំ៣ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
ជនសង្ស័យដែលត្រូវសមត្ថកិច្ចឃាត់ខ្លួនបាន មានឈ្មោះ យឺន វឌ្ឍនៈ ហៅឌុន ភេទប្រុស អាយុ១៨ឆ្នាំ មុខរបបកម្មកររោងចក្រ ស្នាក់នៅភូមិបឹងធំ សង្កាត់បឹងធំ ខណ្ឌពោធិ៍សែនជ័យ។ ចំណែកម្នាក់ទៀត ដែលរត់គេចខ្លួនរួច មានឈ្មោះ ណាង ភេទប្រុស អាយុ២២ឆ្នាំ។ ដោយឡែក ជនរងគ្រោះមានឈ្មោះ សុង មករា ភេទស្រី អាយុ៣០ឆ្នាំ មុខរបបពេទ្យ ស្នាក់នៅផ្ទះជួល ម្តុំសេះស ភូមិដំណាក់ធំ៣ ផ្លូវ៣០ម៉ែត សង្កាត់ស្ទឹងមានជ័យ៣ ខណ្ឌមានជ័យ មានស្រុកកំណើតភូមិអន្លង់ថ្លឹង ឃុំមហាសាំង ស្រុកភ្នំស្រួច ខេត្តកណ្តាល ហើយម៉ូតូដែលជនសង្ស័យលួចយកទៅ គឺម៉ាក ស៊ុយសុគី និច ពណ៌ស មិនចាំស្លាកលេខ។
លោក ឯម ភារី នាយប៉ុស្តិ៍នគរបាលស្ទឹងមានជ័យ៣ ឲ្យដឹងថា មុននឹងឈានទៅដល់ការឃាត់ខ្លួនជនសង្ស័យរូបនោះបាន គឺមានស្ត្រីជាជនរងគ្រោះបានយកម៉ូតូម៉ាក ស៊ុយសុគីនិច ពណ៌ស មួយគ្រឿង មិនចាំស្លាកលេខ ព្រោះម៉ូតូនេះ ជាម៉ូតូរបស់ប្អូនគាត់ យកមកមុខទុកនៅមុខផ្ទះ ដូចធម្មតាជារៀងរាល់ថ្ងៃ។ លុះដល់ពេលកើតហេតុ ក៏ស្រាប់តែលេចមុខជនសង្ស័យ២នាក់ បានដើរចូលទៅធ្វើជាទិញថ្នាំពេទ្យ ហើយពេលនោះដែរ ជនសង្ស័យម្នាក់ ក្នុងចំណោមបក្ខពួកពីរនាក់ បានធ្វើសកម្មភាពកាច់កម៉ូតូរបស់គាត់ ដែលទុកនៅមុខផ្ទះបានសម្រេចរួចហើយ បានជិះរត់គេចខ្លួនបាត់ស្រមោលទៅ ដោយបន្សល់ទុកបក្ខពួកម្នាក់ នៅនឹងកន្លែងកើតហេតុ ហើយពេលនោះ កម្លាំងរបស់លោកដែលល្បាតឆ្លងកាត់ទីនោះ ក៏បានប្រទះឃើញហេតុការណ៍នេះ ក៏ឃាត់ខ្លួនជនសង្ស័យរូបនោះ យកទៅធ្វើការសាកសួរនៅប៉ុស្តិ៍នគបាលស្ទឹងមានជ័យ៣តែម្តង។
នៅចំពោះមុខសមត្ថកិច្ច ជនសង្ស័យរូបនោះ បានសារភាពថា រូបគេ និងបក្ខពួកម្នាក់ទៀត ពិតជាបានធ្វើសកម្មភាពកាច់កយកម៉ូតូរបស់ជនរងគ្រោះពិតប្រាកដមែន ហើយពួកគេធ្លាប់បានធ្វើសកម្មភាពកាច់កម៉ូតូបានសម្រេចចំនួន៣ដងរួចមកហើយ។
ក្រោយពេលកើតហេតុ បន្ទាប់ពីសាកសួររួចហើយ ជនរងគ្រោះបានមកដាក់ពាក្យបណ្តឹងនៅប៉ុស្តិ៍នគបាលស្ទឹងមានជ័យ៣ ដើម្បីឲ្យសមត្ថកិច្ចចាត់ការតាមផ្លូវច្បាប់។ ចំណែកជនសង្ស័យវិញ ត្រូវបានសមត្ថកិច្ចកសាងសំណុំរឿង និងបញ្ជូនខ្លួនទៅអធិការដ្ឋានខណ្ឌមានជ័យ ដើម្បីចាត់ការបន្តតាមនីតិវិធី៕
