ព្រះវិហារៈ នេះជាលើកទី២ហើយ ដែលប្រធានមន្ទីរសាធារណការ និងដឹកជញ្ជូនខេត្តព្រះវិហារបានផ្ទុះរឿងអាស្រូវ ផ្ទុះរឿងអាស្រូវក៏ព្រោះតែលោកជាប់ព័ន្ធទៅនឹងរឿងពុករលួយ ដែលធ្វើឲ្យបាត់បង់ថវិកាជាតិប្រមាណ៧៥ម៉ឺនដុល្លារស្មើរនឹង៣០០០លានរៀល ប៉ុន្តែត្រង់ចំណុចនេះ លោកប្រធានមន្ទីរបានបដិសេធ និងហ៊ានប្រកាសជាចំហថា លោកមិនធ្វើឲ្យនាយករដ្ឋមន្រ្តី អភិបាលខេត្ត និងរដ្ឋមន្រ្តីក្រសួងសាធារណការខកចិត្តឡើយ។
យោងតាមបណ្តាញសារព័ត៌មាន ក្នុងស្រុកបានផ្សាយថា ប្រធានមន្ទីរសាធារណការ និងដឹកជញ្ជូនខេត្តព្រះវិហារ លោក សំ លាងទ្រី ត្រូវបានគេទម្លាយថា ពាក់ព័ន្ធអំពើពុករលួយ រឿងថវិការដ្ឋប្រមាណ៣០០០លានរៀលសម្រាប់យកមកជួសជុលផ្លូវនៅក្នុងខេត្តព្រះវិហារ កាលជំនាន់លោករដ្ឋមន្រ្តី ត្រាំ អ៊ីវតឹក។
តាមសេចក្តីរាយការណ៍ កញ្ចប់ថវិកាសម្រាប់ជួសជុលផ្លូវថ្នល់ក្នុងខេត្តព្រះវិហារប្រមាណជាង ៣០០០លានរៀលនេះ គឺបើកជាបីជំហាន ដោយជំហានទី១ បើកបានជាង១០០០លានរៀល (យកទៅធ្វើផ្លូវមិនអស់៣០០លានរៀលផង)។ ជំហានទី២ បើកបានជាង៨០០លានរៀល (មិនយកទៅចំណាយលើផ្លូវទេ) និងជំហានទី៣ បើកបានជាង ៦០០លានរៀល យកទៅជួសជុលបន្តិចបន្តួច ដើម្បីបង្ហាញថា មានសកម្មភាពធ្វើខ្លះ។
ប្រធានមន្ទីរសាធារណការ និងដឹកជញ្ជូនខេត្តព្រះវិហារ លោក សំ លាងទ្រី នៅរសៀលថ្ងៃព្រហស្បតិ៍ទី២៥ មករា ២០១៨ បានប្រាប់អង្គភាពសារព័ត៌មាន CAM POST ថា លោកមិនធ្វើឲ្យសម្តេចនាយករដ្ឋមន្រ្តី អភិបាលខេត្ត និងលោករដ្ឋមន្រ្តី ខកបំណងឡើយ លោកធានាថា លោកស្អាតស្អំ ជុំវិញរឿងនេះ។
បើតាម សំ លាងទ្រី “ខ្ញុំសូមបដិសេធទាំងស្រុង...... ហើយខ្ញុំសូមទទួលខុសត្រូវចំពោះមុខច្បាប់ប្រឆាំងអំពើពុករលួយ ប្រសិនបើរកឃើញថា ខ្ញុំពាក់ព័ន្ធការកឹបកេងថវិការដ្ឋប្រមាណ៣០០០លានរៀល “។
លោកប្រធានមន្ទីរ បានបញ្ជាក់ថា ឆាប់ៗនេះ នឹងមានក្រុមអធិការកិច្ចចុះត្រួតពិនិត្យហើយ ប៉ុន្តែលោកមិនខ្លាចប្រឈមទេ ហើយលោកសូមធានាអះអាងថា នៅក្នុងខេត្តព្រះវិហារមិនមានទេ ផ្លូវសំបុកមាន់។
ក្រៅពីការចោទថា លោក សំ លាងទ្រី បានឃុបឃិតកឹបកេងលុយរដ្ឋ លោកក៏មានរឿងអាស្រូវមួយទៀតផងដែរ ដែលគេរិះគន់ថា លោកបានយកថវិកាឯកជន ទៅទិញគ្រឿងចក្ររាប់សិបគ្រឿង ហើយយកមកជួលឲ្យមន្ទីរសាធារណការក្នុងតម្លៃខ្ពស់ ដោយមិនមានការដេញថ្លៃត្រឹមត្រូវ ប៉ុន្តែត្រង់ចំណុចនេះ លោកប្រធានមន្ទីបានច្រានចោល។ លោកថា ពេលខ្លះលោកបានជួលគ្រឿងចក្រឲ្យរដ្ឋមែន ប៉ុន្តែមិនមានន័យថា ជួលគ្រប់គ្រឿងចក្រនោះទេ។
អភិបាលខេត្តព្រះវិហារ លោក អ៊ុន ចាន់ដា បានប្រាប់អង្គភាពសារព័ត៌មាន CAM POST នៅរសៀលថ្ងៃព្រហស្បតិ៍នេះថា “ យើងនឹងស្រាវជ្រាវរកការពិតជុំវិញរឿងនេះ ហើយយើងក៏ស្នើឲ្យក្រសួងបើកអធិការកិច្ចផងដែរ”។
ទោះជាបែបណា អង្គភាពសារព័ត៌មាន CAM POST នៅរសៀលថ្ងៃទី២៥ មករានេះ មិនអាចទំនាក់ទំនងសុំការបំភ្លឺពីអ្នកនាំពាក្យក្រសួងសាធារណការ និងដឹកជញ្ជូន លោក ឯ ស៊ីមសូរិយា បានទេ ដោយទូរសព្ទមិនចូល៕
