ព្រះសីហនុៈ យុវជនម្នាក់ ត្រូវបានគេប្រទះឃើញដេកស្លាប់ ក្នុងរថយន្តក្រុមហ៊ុនស្រាបៀរអង្គរ បង្កឲ្យមានការភ្ញាក់ផ្អើលកាលពីវេលាម៉ោង៧និង១០នាទីព្រឹកថ្ងៃព្រហស្បត៍ ២កើត ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៨ ខែមករា ឆ្នាំ២០១៨ ស្ថិតនៅភូមិ មនោរម្យ ឃុំតានៃ ស្រុកព្រៃនប់ ខេត្តព្រះសីហនុ។
បើតាមឈ្មោះ ឃឹម សុវណ្ណ ភេទប្រុស អាយុ៣៨ឆ្នាំ មុខរបរ បើកបររថយន្តក្រុមហ៊ុនស្រាបៀរអង្គរ មានទីលំនៅភូមិសាលាគំរូ ឃុំព្រៃញី ក្រុងពោធិ៍សាត់ ខេត្តពោធិ៍សាត់ បានឲ្យដឹងថា យុវជនដែលដេកស្លាប់នេះ ឈ្មោះ ជួន សំណាង ភេទប្រុស អាយុ២៦ឆ្នាំ មានទីលំនៅ ភូមិជ្រោយស្រឡៅ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ ហើយរថយន្តដែលយុវជននេះដេកស្លាប់ គឺជារថយន្តក្រុមហ៊ុនស្រាបៀរអង្គរ ពាក់ស្លាកលេខ ភ្នំពេញ ៣C-២១៧៥។
មូលហេតុនៃការស្លាប់នេះ គេមិនទាន់ដឹងនៅឡើយទេ រង់ចាំសមត្ថកិច្ចជំនាញចុះមកធ្វើកោសល្យវិច្ច័យសិន៕
