សមាគមគ្រូបង្រៀនកម្ពុជាឯករាជ្យបានចេញសេចក្ដីជូនដំណឹងនៅថ្ងៃទី២១ ខែមករា ឆ្នាំ២០១៨ ថាគណៈកម្មាធិការនាយកនៃសមាគមនេះ បានសម្រេចតែងតាំងលោក រុង ឈុន ជាទីប្រឹក្សាសមាគមគ្រូបង្រៀនកម្ពុជាឯករាជ្យ។
យោងតាមសេចក្ដីជូនដំណឹងនេះ ក្រៅពីតួនាទីជាទីប្រឹក្សា លោក រ៉ុង ឈុន ក៏នឹងទទួលបន្ទុកកិច្ចការទំនាក់ទំនងជាតិ និងអន្តរជាតិ ជួយរៀបចំផែនការ និងយុទ្ធសាស្រ្តសមាគម និងជួយផ្ដល់បទសម្ភាសឲ្យអ្នកសារព័ត៌មានអំពីការងារសមាគម និងសង្គមផងដែរ។
លោក រ៉ុង ឈុន គឺជាអតីតសមាជិក គ.ជ.ប.មកពីកូតាគណបក្សសង្គ្រោះជាតិ ប៉ុន្តែលោកបានលាលែងចេញពីតួនាទីនៅស្ថាប័នរៀបចំការបោះឆ្នោត បន្ទាប់ពីគណបក្សសង្គ្រោះជាតិត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកា ឆ្នាំ២០១៧ ។
លោក រ៉ុង ឈុន ធ្លាប់ជាប្រធានសមាគមគ្រូបង្រៀនកម្ពុជា មុននឹងលោកត្រូវបានគណបក្សសង្រ្គោះជាតិ សម្រចជ្រើសរើសឲ្យធ្វើជាសមាជិក គ.ជ.ប. ក្រោយមានការសម្របសម្រួលផ្នែកនយោបាយរវាងគណបក្សប្រជាជនកម្ពុជា និងគណបក្សសង្រ្គោះជាតិ នៅឆ្នាំ២០១៤។
