លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានថ្លៃងក្នុងកិច្ចប្រជុំតុមូល ស្តីពីដំណើរឆ្ពោះទៅកាន់ការបោះឆ្នោតខែកក្កដា ឆ្នាំ២០១៨ ថាការប្រកាសរបស់លោក សម រង្ស៊ី អតីតប្រធានគណបក្សសង្គ្រោះជាតិឱ្យមានការបង្កើតចលនាសង្គ្រោះជាតិនោះជាអំពើខុសច្បាប់ ដែលនេះជាផែនការរំលោភអំណាចពីរាជរដ្ឋាភិបាលស្របច្បាប់។
ប្រធានរាជបណ្ឌិត្យសភាកម្ពុជា ថាចលនាសង្រ្គោះជាតិមានតែ ចលនា២ ធ្នូ ឆ្នាំ១៩៧៨ និង៧ មករា ទេ ដែលបានចារក្នុងប្រវត្តិសាស្រ្ត មិនអាចមានជាលើកទី២ឡើយ។ លើសពីនេះ ចលនាសង្គ្រោះជាតិ ក្រោយ ៧ មករា បានមានកំណើនការអភិវឌ្ឍទាំងសេដ្ឋកិច្ច សង្គមជាតិ និងការរស់នៅសុខុម ដម របស់ប្រជាពលរដ្ឋ។
លើសពីនេះ លោក សុខទូច ថាប្រទេសជិតខាងយើង (ឡាវ វៀតណាម ថៃ) គេមិនអនុញ្ញាតឱ្យមានការរៀបចំផែនការបង្កើតចលនាសង្គ្រោះជាតិដូចការប្រកាសរបស់អតីតគណបក្សសង្គ្រោះជាតិនោះទេ ព្រោះនេះ ជាការរំលោភសិទ្ធិរបស់ប្រទេសកម្ពុជា ដែលដឹកនាំដោយរាជរដ្ឋាភិបាលស្របច្បាប់។ ប្រទេសកម្ពុជាបានចែងច្បាប់យ៉ាងជាក់លាក់ ប្រសិនគណបក្សណាមួយមិនពេញចិត្តឬមានការតវ៉ា គឺត្រូវចូលមកតទល់នៅក្នុងប្រទេសកម្ពុជា ឬនៅក្នុងអាស:នៃរដ្ឋសភា ឬតុលាការ ដោយមិនមែនចេះតែលើកឡើងដោយខុសពីការពិតនោះទេ។
