លោក ឈាង វុន តំណាងរាស្ត្រមកពីគណបក្សប្រជាជនកម្ពុជា បាន comment ក្នុងហ្វេសប៊ុកកញ្ញា ស៊ិន ចាន់ពៅរ៉ូហ្សិត ទីតាំងលក់ដូររបស់នាងកញ្ញា អាចជាទីតាំង "គាំទ្រចលនាក្រុមឧទ្ទាម"។
ឆ្លើយតបទៅនឹងការចោទប្រកាន់នេះ ស៊ិន ចាន់ពៅរ៉ូហ្សិត អតីតចៅសង្កាត់អូរចារក៏មានប្រជាប្រិយភាពថា៖ កញ្ញាមិនបានយកកន្លែងលក់ដូរ របស់ខ្លួននេះទៅធ្វើជាទីតាំងអ្វីផ្សេងដែលប្រឆាំងនឹងការហាមឃាត់របស់រដ្ឋាភិបាលទេ។ មុខរបរដែលកញ្ញាកំពុងដំណើរការលក់ដូរ "នំបញ្ចុកខ្មែរ" រាល់ថ្ងៃនេះ គឺធ្វើដើម្បីរកប្រាក់កម្រៃចិញ្ចឹម "អ្នកម្តាយ" កញ្ញា និងដោះស្រាយបង់រំលួសបំណុលផ្ទះសំបែងបន្តិចបន្តូចតែប៉ុណ្ណោះ។
កញ្ញាបញ្ជាក់ទៀតថា៖ កញ្ញាពិតជាមានការព្រួយបារម្ភ និងសោយស្តាយបំផុត ដែលលោកអ៊ុំ ឈាង វុន Comment ចោទប្រកាន់លើហ្វេសបុកកញ្ញាថាទីតាំងលក់ដូររបស់កញ្ញា អាចជាទីតាំង "គាំទ្រចលនាក្រុមឧទ្ទាម"។ ការ comment របស់លោកអ៊ុំនេះ ពិតជាមានបំណងចង់បិទហាងរបស់កញ្ញា ឬមួយធ្វើមិនឱ្យមានភ្ញៀវហ៊ានចូលហាងឬមិនចង់ឲ្យកញ្ញារស់នៅ "ចិញ្ចឹមអ្នកម្តាយជរា" ម្នាក់បានទេ។
អតីតចៅសង្កាត់អូរចាររូបនេះ អំពាវនាវឱ្យ លោក ឈាង វុន អនុគ្រោះឲ្យក្មេងស្រីម្នាក់នេះរស់នៅជាមួយអ្នកម្តាយចាស់ជរាម្នាក់ផងបានទេ? ឬត្រូវឲ្យនាងរត់ទៅណាទៀត?។
លោកអ៊ុំអើយ! ក្មេងស្រីម្នាក់នេះ មានបន្ទុកធ្ងន់ណាស់! បើនាងខ្ញុំ ចេញទៅណាចោលអ្នកម្តាយ! គឺស្មើនឹងខ្ញុំ "សម្លាប់" អ្នកម្តាយខ្ញុំ ដោយដៃនាងខ្ញុំ ក្រោយពីនាងខ្ញុំត្រូវបាត់មុខងារ (ចៅសង្កាត់) ជាតំណាងប្រជាពលរដ្ឋនៅសង្កាត់អូរចារ នាងខ្ញុំមិនបានធ្វើ ឬប្រកបមុខរបរអ្វី ដែលផ្ទុយពី "ឆន្ទៈ មនសិការ ឧត្តមគតិ" របស់នាងខ្ញុំ ឬខុសច្បាប់របស់សង្គមឡើយ នេះជាការលើកឡើងរបស់ កញ្ញា ស៊ិន ចាន់ពៅរ៉ូហ្សិត។
