កំពតៈ ជនជាតិខ្មែរមកពីខេត្តកំពតម្នាក់ ត្រូវបានអាជ្ញាធរវៀតណាមចាប់ឃាត់ខ្លួន នៅទីក្រុងហាទៀន ខេត្តគៀនយ៉ាង បន្ទាប់ពីលួចរត់ពន្ធស្រូវពីកម្ពុជា ចូលទៅកាន់ប្រទេសវៀតណាម។ នេះជាការចុះផ្សាយរបស់សារព័ត៌មាន Nhan Dan របស់វៀតណាម នៅថ្ងៃទី១៥ ខែមករា ឆ្នាំ២០១៨។
ជនជាតិខ្មែរ ដែលចាប់ខ្លួននោះ ឈ្មោះ ហួរ ណាត (HouNat) ភេទប្រុស អាយុ៣២ឆ្នាំ ត្រូវចាប់ខ្លួន ក្នុងកាលបរិច្ឆេទមិនជាក់លាក់ នៅពេលប៉ុនប៉ងយកប្រាក់ចំនួន១៧៦លានរៀល (ជាង៤ម៉ឺនដុល្លារអាមេរិក)ចេញពីប្រទេសវៀតណាម។
ប៉ូលិសវៀតណាមបានសម្រេចចិត្ត ចាប់ខ្លួនបុរសខ្មែររូបនេះ ពីបទដឹកជញ្ជូនរូបិយប័ណ្ណ និងផលិតផលឆ្លងកាត់ព្រំដែន ដោយមិនបានប្រកាសដល់ទីភ្នាក់ងារមានសមត្ថកិច្ច ដែលផ្ទុយនឹងមាត្រា ១៨៩ នៅក្រោមក្រមព្រហ្មទណ្ឌរបស់វៀតណាម។
អាជ្ញាធរវៀតណាម បានបញ្ជាក់ថា ការនាំចូលស្រូវពីកម្ពុជាទៅវៀតណាមបានក្លាយទៅជារឿងសាមញ្ញក្នុងរយៈពេលប៉ុន្មានឆ្នាំចុងក្រោយនេះ ព្រោះអង្ករកម្ពុជា មានរសជាតិឈ្ងុយឆ្ងាញ់ និងអនាម័យល្អ។
បច្ចុប្បន្ន អាជ្ញាធរវៀតណាមចាត់ចែងករណីខាងលើតាមនីតិវិធីច្បាប់ និងបើកការស៊ើបអង្កេតរកឈ្មួយរត់ពន្ធស្រូវពីកម្ពុជាទៅវៀតណាម ដទៃទៀត៕
