លោក អ៊ូច ឡេង ប្រធានក្រុមកិច្ចការពិសេសសិទ្ធិមនុស្សកម្ពុជា(CHRTF) និងជាសកម្មជនព្រៃឈើម្នាក់ដែលបានចំណាយពេលជាង២០ឆ្នាំក្នុងការការពារព្រៃឈើ ថ្លែងថាឈ្មួញបានដឹកឈើចេញពីខេត្តមណ្ឌលគិរី រតនគិរី ព្រះវិហារ កំពង់ស្ពឺ កំពង់ធំ និងខេត្តផ្សេងទៀត មានប្រហែលជា២០រថយន្តយីឌុក ក្នុងមួយម៉ោង ស្ទើរជារៀងរាល់ថ្ងៃ ចាប់ពីខែ១១ ឆ្នាំ២០១៧ ដល់ ថ្ងៃទី៣១ ខែមករា ឆ្នាំ២០១៨ នេះ ដោយក្នុងមួយរថយន្តមានឈើប្រហែល ៦០ទៅ៧០ម៉ែត្រគូប។
ចំណែក លោក ហឿន សុភាព ប្រជាសហគមន៍ព្រៃឡង់ប្រចំាខេត្តកំពង់ធំ បានឲ្យដឹងដែរថា នៅខេត្តកំពង់ធំឈ្មួញបានដឹកឈើក្នុងមួយថ្ងៃ ៥ទៅ១០គោយន្ត ដោយមិនខ្លាចអាជ្ញាធរនោះទេ។ ករណីនេះលោកថា ដើម្បីទប់ស្កាត់បទល្មើសព្រៃឈើឲ្យមានប្រសិទ្ធភាព បាន លុះត្រាតែរដ្ឋាភិបាលអនុវត្តច្បាប់ឲ្យស្មើភាពគ្នា រវាងអ្នកមាន និងក្រ។
រីឯ លោក ស្រី ថី ប្រជាសហគមន៍ព្រៃឡង់ ប្រចំាខេត្តព្រះវិហារ បានអះអាងថានៅក្នុងខេត្តព្រះវិហារ បទល្មើសព្រៃឈើបន្តកើនឡើងជាងឆ្នំាមុនៗ៧០ភាគរយ ដោយថាក្នុងមួយថ្ងៃឈ្មួញដឹកតាមរថយន្តសំាយ៉ុង និងរថយន្តការ៉េ ជារៀងរាល់ថ្ងៃ ដោយលោកថាទំនងជាអាជ្ញាធរឃុបខិតបើកដៃឲ្យឈ្មួយ នឹងប្រព្រឹត្តអំពើពុករលួយជាដើម ទើបធ្វើឲ្យបទល្មើសនៅតែបន្តកើនឡើងបែបនេះ។
ពលរដ្ឋរស់នៅខែត្រមណ្ឌលគិរី និងអ្នកឃ្លាំមើលបរិស្ថាន អះអាងថាឈ្មួញមានងារជាឧកញ៉ា និងអ្នកមានឥទ្ធិពលមួយចំនួននៅតែបន្តដឹកជញ្ជូនឈើតាមរថយន្តយីឌុប ទៅកាន់ប្រទេសវៀតណាម រឹតតែច្រើនឡើង បើទោះបីជាលោកនាយករដ្ឋមន្ត្រី ហ៊ុន សែន បានបញ្ជាឲ្យអភិបាលខែត្រមួយចំនួនបិទការនាំឈើទៅក្រៅប្រទេសក្តី។ ឈើដែលឈ្មួញដឹកជញ្ជូននោះ មានប្រភពពីតំបន់ព្រៃអភិរក្សភ្នំព្រិច ខែត្រមណ្ឌលគិរី និងតំបន់បាតអាងនៃទំនប់វារីអគ្គិសនីសេសានក្រោមពីរក្នុងខែត្រស្ទឹងត្រែង។
ករណីនេះ លោក ឡេង យល់ថា វិធានការរបស់រដ្ឋាភិបាល លើបញ្ហាទប់ស្កាត់បទល្មើសព្រៃឈើ និងនាំឈើទៅក្រៅប្រទេសនោះ ហាក់មិនមានប្រសិទ្ធិភាពនោះទេ។
កាលពីថ្ងៃទី២៣ ខែមករា ឆ្នាំ២០១៨ នេះ សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ បានបញ្ជាឲ្យមន្ដ្រីក្រោមបង្គាប់ បិទឲ្យអស់ច្រករបៀង ដោយថាដើម្បីទប់ស្កាត់បទល្មើសឆ្លងដែនខុសច្បាប់គ្រប់ប្រភេទ។
នៅថ្ងៃទី២៣មករានោះដែរ អភិបាលខេត្តត្បូងឃ្មុំ លោក លី ឡេង បានប្រាប់ទៅកាន់មន្ដ្រីក្រោមបង្គាប់របស់ខ្លួន ដោយហាមមិនឲ្យមានច្រករបៀងនៅតាមបន្ទាត់ព្រំដែនក្នុងខេត្តត្បូងឃ្មុំឡើយ។ បទបញ្ជារបស់អភិបាលខេត្តត្បូងឃ្មុំដូច្នេះ ធ្វើឡើងក្រោយពីលោកត្រូវបានប្រមុខរដ្ឋាភិបាលស្ដីបន្ទោស និងព្រមានដកចេញពីតំណែង ប្រសិនបើនៅតែកើតមានបទល្មើសឆ្លងដែន ពិសេសបទល្មើសព្រៃឈើ ឆ្លងទៅកាន់ប្រទេសវៀតណាម តាមច្រកត្បូងឃ្មុំទៀតនោះ។
គួររំលឹកថា កាលថ្ងៃទី១៥ ខែមករា ឆ្នាំ២០១៦ រដ្ឋាភិបាលបានសម្រេចបង្កើតគណៈកម្មការជាតិទប់ស្កាត់ និង បង្ក្រាបបទល្មើសព្រៃឈើ ដែលាមាន លោក សៅ សុខា ជាប្រធានគណៈកម្មការ។
