កំពង់ស្ពឺៈ យ៉ាងហោចណាស់ កម្មករ កម្មការិនី៥៥នាក់រងរបួសធ្ងន់ស្រាល បន្ទាប់ពីតៃកុងរថយន្តបើកបរជែងគ្នាក្នុងស្ថានភាពគ្រោះថ្នាក់ បណ្តាលឲ្យក្រឡាប់។
ករណីគ្រោះថ្នាក់ចរាចរណ៍នេះ កើតឡើងនៅវេលារសៀល ថ្ងៃអង្គារ ៨រោច ខែបុស្ស ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៩ ខែមករា ឆ្នាំ២០១៨ នៅលើផ្លូវជាតិលេខ៥១ ត្រង់ចន្លោះគីឡូម៉ែត្រលេខ១៦-១៧ ស្ថិតក្នុងភូមិតាឡាក់ ឃុំក្សេមក្សាន្ត ស្រុកឧដុង្គ ខេត្តកំពង់ស្ពឺ។
ស្នងការរងខេត្តកំពង់ស្ពឺ ឧត្តមសេនីយ៍ត្រី តាប់ លន បានប្រាប់ឲ្យដឹងថា មុនពេលកើតហេតុ មានរថយន្តដឹកកម្មករ១គ្រឿង ម៉ាក HYUNDAI PORTER ពណ៌ស ពាក់ស្លាកលេខ កំពង់ស្ពឺ 2A-4216 បើកបរដោយឈ្មោះ សុត ធារ៉ា ភេទប្រុស អាយុ២៦ឆ្នាំ រស់នៅភូមិខាងលើ ធ្វើដំណើរក្នុងទិសដៅពីត្បូងទៅជើង ដោយមានដឹកកម្មករកម្មការិនីប្រមាណ៥៥នាក់។ លុះមកដល់ចំណុចកើតហេតុ បានបើកជែងរថយន្តមិនស្គាល់ម៉ាក១គ្រឿង ដែលកំពុងធ្វើដំណើរស្របទិសគ្នាទាំងស្ថានភាពផ្លូវគ្រោះថ្នាក់ផងនោះ ក៏បណ្តាឲ្យក្រឡាប់ចាក់អ្នកដំណើរចេញពីរថយន្ត របួសដេករដូករណែលពេញផ្លូវតែម្តង។
ក្រោយកើតហេតុ នគរបាលមូលដ្ឋានបានចុះដល់កន្លែងកើតហេតុ និងដឹកបញ្ជូនអ្នករបួសទាំង៥៥នាក់ ទៅសង្គ្រោះនៅមន្ទីរពេទ្យ។ ចំណែករថយន្ត សមត្ថកិច្ចយកទៅរក្សាទុកនៅអធិការដ្ឋាននគរបាលខេត្ត រង់ចាំដោះស្រាយនៅពេលក្រោយ៕
