កំពតៈ សមត្ថកិច្ច ដែលប្រចាំការ នៅច្រកទ្វារទ្វេភាគី តន់ហន់ បានបដិសេធថា នៅច្រករបស់លោក មិនដែលមានកាដឹកជញ្ជូន ឈើប្រណីតទៅប្រទេសវៀតណាមនោះទេ។
លោក ផាន់ កែវ ដែលរងការចោទប្រកាន់ថា ជាមេឈ្មូញរកស៊ី ដឹកជញ្ជូនឈើទៅប្រទេសវៀតតាមច្រកតន់ហន់នោះ ពុំមែនជាការពិតទេ។
លោក នាក់ សុវណ្ណគិរី មេប៉ុស្តិ៍ច្រកទ្វាទ្វេរភាគី តន់ហន់ បានប្រាប់ CAM POST កាលពីវេលា ម៉ោង១០និង១០នាទីព្រឹកថ្ងៃទី៣ ខែមករា ឆ្នាំ២០១៨នេះថា តាំងពីលោកមកធ្វើជាមេប៉ុស្តិ៍ មិនដែលឃើញមានការដឹកជញ្ជូនឈើប្រណីតឆ្លងកាត់ប៉ុស្តិ៍របស់លោកទេ សូម្បីតែមួយដុំក៏គ្មានដែរ។
លោកបានបន្តទៀតថា អ្វីដែល គេនិយាយនោះវាមិនពិតនោះទេ សព្វថ្ងៃនេះ រកតែលុយ ទិញបាយឲ្យកូនចៅហូបចុកក៏គ្មានផង។
សូមរំលឹកថា ជុំវិការបដិសេធរបស់សមត្ថកិច្ចប្រចាំច្រកទ្វារទ្វេភាគីតន់ហន់ខាងលើន បន្ទាប់ពីមានប្រភពបង្ហើបឲ្យដឹងថា ប៉ុន្មានខែនេះ មានឈ្មួញឈើបានធ្វើសកម្មភាពនាំចេញឈើប្រណីតទៅវៀតណាម តាមច្រកទ្វារទ្វេភាគី តន់ហន់ ស្ថិតក្នុងស្រុកកំពង់ត្រាច ខេត្តកំពត ហើយការនាំឈើនេះ អាចមានការឃុបឃិតគ្នា ពីក្រុមសមត្ថកិច្ច និងមន្ត្រីពាក់ព័ន្ធ នៅច្រកទ្វារព្រំដែននេះ។
ប្រភពលួចបង្ហើបបន្តថា បច្ចុប្បន្ននេះ ឈ្មួញឈើរូបនោះ កំពុងតែរត់ការបង់លុយ ទៅឲ្យសមត្ថកិច្ច ពាក់ព័ន្ធមួយចំនួនក្នុងខេត្ត ជាពិសេសខាងជំនាញរដ្ឋបាលព្រៃឈើតែម្តង រួមនិងអាជ្ញាធរ មូលដ្ឋាន គ្រប់លំដាប់ថ្នាក់ នៅក្នុងខេត្ត ដើម្បីទទួលបានសិទ្ធិក្នុងការនាំចេញឈើ ទៅលក់នៅ ប្រទេសវៀតណាម។
សមត្ថកិច្ចតូចតាច ដែលមិនបានទទួលាភសក្ការៈពីក្រុមឈ្មូញនោះ បានខ្សឹមដាក់ត្រចៀកក្រុម អ្នកសារព័ត៌មានថា អ្នកដែលរ់តការនាំឈើទៅប្រទេសវៀតណាម តាមច្រកទ្វេភាគី តន់ហន់ គឺឈ្មោះ ផាន់ កែវ ជាទាហាន នៅវរការពារព្រំដែនលេខ៣០២ ជាកូនចៅរបស់លោក ជួន ម៉ារ៉ាឌី ហើយមានតួនាទីជាមេបញ្ជាការ “គ២” ប្រចាំច្រកទ្វារទ្វេភាគី តន់ហន់។
សមត្ថកិច្ចតូចតាចទាំងនោះ ក៏បន្តខ្សឹបទៀតថា លោក ផាន់ កែវនេះ ពូកែខាងអែបអបថ្នាក់លើ ហើយការនាំឈើទៅប្រទេសវៀតណាមនេះ ក៏មានការបើកភ្លើងខៀវ ពីលោក ជួន ម៉ារ៉ាឌី មេបញ្ជាការវរការពារព្រំដែន៣០២ និងលោក យឹម ប៊ុនធឿន មេបញ្ជាការតំបន់ប្រត្តិបត្តិការសឹងរងខេត្តផងដែរ។ បើពុំមានការបើកភ្លើងខៀវនេះទេ លោក ផាន់ កែវ មិនហ៊ានចេញមុខរត់ការនាំ ឈើប្រណីតទៅប្រទេសវៀតណាមនោះទេ។
ប្រភពបាននិយាយឲ្យដឹងទៀតថា លោក ផាន់ កែវ បាននាំឈើ មកពីខេត្តកំពង់ស្ពឺ ទៅប្រទេសវៀតណាម ចូលតាមច្រកទ្វារទ្វេភាគី តន់ហន់ ខេត្តកំពតយ៉ាងរលូន មិនរំខានដល់សមត្ថកិច្ចបន្តិចសោះឡើយ៕
