កណ្ដាលៈ ឃាតកស្រីដៃឆោចាក់សម្លាប់ថៅកែហាងម៉ាស្សា និងជាអ្នកសារព័ត៌មានសំឡេងប្រជាជន នៅរសៀលថ្ងៃទី២៦ ខែមករា ឆ្នាំ២០១៨ នេះ ត្រូវបានកម្លាំងនគរបាលស្រុកអង្គស្នូល បញ្ជូនមកអយ្យការអមសាលាដំបូងខេត្តកណ្ដាល ដើម្បីចាត់ការតាមច្បាប់។
បើតាមមន្ត្រីតុលាការ បានថ្លែងថា ជនសង្ស័យកំពុងស្ថិតក្រោមការសាកសួរពីសំណាក់លោក ឯក ស៊ុនរស្មី ព្រះរាជអាជ្ញារងនៃអយ្យការអមសាលាដំបូងខេត្តកណ្ដាល។
អំពើឃាតកម្មគិតទុកជាមុនដ៏សាហាវព្រៃផ្សៃនេះ ត្រូវបានស្ត្រីសង្ស័យ អះអាងថា ដោយសារមានមេធាវីមួយរូបឈ្មោះ សូ តារា ត្រូវការប្រាក់ចំនួន២៥០០ដុល្លារអាមេរិក ដើម្បីរត់ការដោះលែងប្តី (ស្រ្តីឃាតក) ដែលកំពុងជាប់ពន្ធនាគារព្រៃស ឱ្យមានសេរីភាពឡើងវិញ។
សូមជម្រាបថា ត្រឹមរយៈពេល៥ថ្ងៃ ក្នុងយុទ្ធនាការបង្ក្រាបឃាតកចាក់សម្លាប់ថៅកែហាងម៉ាស្សា និងជាអ្នកសារព័ត៌មានសំឡេងប្រជាជន កម្លាំងនគរបាលព្រហ្មទណ្ឌកម្រិតធ្ងន់សហការជាមួយនគរបាលស្រុកអង្គស្នួល ដឹកនាំដោយលោកវរសេនីយ៍ មាន សំណាង អធិការស្រុកអង្គស្នួល បាននាំឃាតកចាក់សម្លាប់ជនរងគ្រោះជាច្រើនកាំបិត ទៅធ្វើត្រាប់ និងនាំទៅដកហូតវត្ថុតាង ដែលឃាតកយកទៅលក់ដូរយកប្រាក់។
បន្ទាប់ពីឲ្យឃាតកធ្វើត្រាប់រួច ស្ត្រីសង្ស័យ សារភាពថា មុននឹងសម្រេចចិត្តចាក់សម្លាប់ជនរងគ្រោះ គឺដោយសារខ្លួនចង់បានលុយចំនួន២៥០០ដុល្លារ ឱ្យលោកមេធាវីឈ្មោះ សូ តារា ដើម្បីធានាឱ្យរត់ការប្តី ដែលជាប់ឃុំក្នុងពន្ធនាគារព្រៃស ពាក់ព័ន្ធករណីគ្រឿងញៀន ឱ្យមានសេរីភាពឡើងវិញ។
ឃាតកបានបន្ថែមទៀតថា ប្តីរបស់នាងឈ្មោះ សាត ប៊ុនចាន់ ដែលសមត្ថកិច្ចចាប់នៅស្ពានព្រែកព្នៅ។ ស្ត្រីជាឃាតកឈ្មោះ ផេង ណាត អាយុ៣២ឆ្នាំ ស្នាក់នៅផ្ទះជួលក្នុងភូមិ ព្រៃបឹង សង្កាត់កន្ទោក ពោធិ៍សែនជ័យ។ ចំណែកជនរងគ្រោះ ត្រូវស្រីស្នេហ៍(ឃាតក)ចាក់ប្រហារចំនួន១៧កាំបិត នៅក្នុងបន្ទប់ផ្ទះសំណាក់៕
