លោក កឹម សុខា ដែលកំពុងជាប់ឃុំនៅពន្ធធាគារត្រពាំងថ្លុង ថាមិនគាំទ្រ និងមិនចូលរួមចលនាសង្រ្គោះជាតិជាមួយលោក សម រង្ស៊ី ទេ។
ជំហររបស់លោក កឹម សុខា ត្រូវបានលោក មុត ចន្ថា អតីតជំនួយការផ្ទាល់របស់ លោក កឹម សុខា បង្ហើបឲ្យដឹងតាមរយៈហ្វេសប៊ុករបស់ខ្លួនថា៖ ឯកឧត្តម កឹម សុខា ប្រធានគណបក្សសង្គ្រោះជាតិ មានប្រសាសន៍បញ្ជាក់ជំហរយ៉ាងច្បាស់ថា មិនចូលរួមជាមួយចលនាបង្កើតថ្មី និងមិនគាំទ្រចលនាថ្មីនេះ។
“បន្តនៅជាមួយឆន្ទៈរបស់ប្រជាពលរដ្ឋខ្មែរជាង ០៣លាន ដែលបានបោះឆ្នោតជូនគណបក្សសង្រ្គោះជាតិ”។
លោក សម រង្ស៊ី និងលោក កឹម សុខា ជាសហស្ថានិកក្នុងការបង្កើតគណបក្សសង្គ្រោះជាតិ កាលពីអំឡុងឆ្នាំ២០១២ ប៉ុន្តែគណបក្សប្រឆាំងដ៏ធំមួយនេះ ត្រូវបានរំលាយដោយអំណាចសាលដីកាតុលាការកំពូលកាលពីថ្ងៃទី១៦ ខែវិច្ឆិកា ឆ្នាំ២០១៦ ចំណែកឯ លោក កឹម សុខា ត្រូវបានតុលាការចោទពីបទក្បាត់ជាតិ។
លោក សម រង្ស៊ី កាលពីពេលថ្មីនេះ បានបង្កើតចលនាសង្គ្រោះជាតិថ្មីមួយ ដើម្បីគៀងគរ និងរក្សាកម្លាំងនយោបាយរបស់ក្រុមប្រឆាំង។
