ភ្នំពេញៈ កាលពីយប់មិញនេះ នាយ ចឺម និងនាយ ក្តី ដែលកំពុងល្បីថា មានទំនាក់ទំនងគ្នាយ៉ាងស្អិតរមួត ជុំវិញការទំនុកបម្រុងគ្នារហូតមានការលើកឡើងថា មានស្នេហាភេទដូចគ្នានោះ បានប្រារព្ធពិធីខួបកំណើតក្នុងចំណងជាបងប្អូនរយៈពេល១ឆ្នាំ ក្រោមការដឹងឮពីសាច់ញាតិ និងមិត្តភ័ក្តិផងដែរ។
បញ្ជាក់ប្រាប់ក្នុងឱកាសខួបកំណើត គ្រងដោយឈុតអាចារ្យខ្មែរ អ្នកទាំង២ បានរៀបរាប់ថា ថ្ងៃនេះ ពួកយើង រៀបចំពិធីខួបកំណើត ស្តីពីទំនាក់ទំនងរាប់រកគ្នាជាបងប្អូនធម៌បាន១ឆ្នាំ។ ការរាប់រកគ្នានេះ មិនមែនចេះតែសុខៗរាប់អាននោះទេ គឺយើងបានរៀបចំពិធីសែនព្រេន អុជធូប មានចំណីអាហារសែនជូនដូនតា ប្រកាសជាទូទៅ ដើម្បីឲ្យបានដឹងឮថា ពួកយើងរាប់គ្នា ដូចបងប្អូនបង្កើត។
ជាមួយគ្នា អ្នកទាំង២ បានស្នើជាថ្មីម្ដងទៀត សូមបងប្អូនកុំភ័ន្តច្រឡំជាបន្តទៀត រឿងពួកគេទាំង២ ពិតជាមិនបានក្លាយជាមនុស្សស្រឡាញ់ភេទដូចគ្នា តាមតែពាក្យលើកឡើងឡើយ។ នេះជាលើកទី៣ហើយ ដែលពួកគេប្រកាសជាទូទៅថា មនុស្សប្រុសគ្មានអារម្មណ៍នោះទេ ក្នុងចិត្តរបស់គេទាំង២ បើម្នាក់ៗឃើញស្រីមិនបាន។
អ្នកទាំង២ អះអាងទៀតថា ការកកើតទំនាក់ទំនងស៊ីជម្រៅនេះ ដោយសារម្នាក់ៗ មានចំណុចល្អដូចជារួមគ្នា រកស៊ីចេះតែរលូនទៅមុខ ហើយបើនិយាយពីសិល្បៈវិញ ម្នាក់ៗដើរទៅមុខដូចគ្នា មានគេស្គាល់ថា ពួកគេជាដៃគូសម្តែង។ ដូចនេះ រំពឹងថា បងប្អូនទស្សនិកជនទាំងអស់ និងបន្សាបការលើកឡើងកន្លងមក បញ្ឈប់ការឆ្ងល់តទៅទៀត ព្រោះទោះជាបែបណា ក៏មិនអាចទៅរួច ឬចងជាស្នេហាបុរសជាមួយបុរសបានឡើយ។
ទោះជាបែបណា សារព័ត៌មាន ក៏ដូចជាមាត់មហាជនម្នាក់ៗ បានលើកឡើងតៗគ្នាថា ទាំងនាយ ចឺម និងនាយ ក្ដី ពិតជាអាចមានទំនាក់ទំនងស្នេហារវាងបុរស និងបុរស ព្រោះតែទំនាក់ទំនងដ៏ស្អិតរមួតរបស់អ្នកទាំងពីរ។ លើសពីនេះទៅទៀត ព័ត៌មានកាន់តែច្បាស់ នៅពេលដែលនាយ ក្ដី សុខចិត្តលែងលះប្រពន្ធ ដែលមានចំណងកូន២នាក់ហើយនោះ ដោយសារទំនាក់ទំនងមួយនេះ៕
