ត្បូងឃ្មុំៈ សន្និបាតបិទទ្វាររបស់គណបក្សប្រជាជនកម្ពុជា ត្រូវបានគេទម្លាយថា អភិបាលខេត្តត្បូងឃ្មុំ ក្នុងនាមជាសមាជិកបក្ស ត្រូវប្រធានគណបក្ស និងជានាយករដ្ឋមន្រ្តី ស្តីបន្តោសឲ្យធ្ងន់ៗ និងព្រមានដកចេញពីតំណែងទៀតផង ប្រសិនបើមិនបង្រ្កាបបទល្មើសព្រៃឈើឆ្លងកាត់ទៅប្រទេសវៀតណាម។
យោងតាមប្រភពព័ត៌មាន បានទម្លាយថា កាលពីថ្ងៃទី២១ ខែមករាកន្លងទៅថ្មីៗ ដែលជាថ្ងៃបិទបញ្ចប់សន្និបាតរយៈពេល៣ថ្ងៃ របស់គណបក្សប្រជាជនកម្ពុជា នៅមជ្ឈមណ្ឌលកោះពេជ្រ ប្រធានគណបក្សប្រជាជនកម្ពុជា និងជានាយករដ្ឋមន្រ្តី សម្តេចតេជោ ហ៊ុន សែន បានស្តីបន្តោសខ្លាំងៗទៅកាន់អភិបាលខេត្តត្បូងឃ្មុំ លោក លី ឡេង ពាក់ព័ន្ធទៅនឹងបទល្មើសព្រៃឈើ។
បើតាមទំព័រហ្វេសប៊ុកអ្នកសារព័ត៌មាន ដែលស្និតនឹងរដ្ឋាភិបាលម្នាក់ បានផ្សាយនៅព្រឹកថ្ងៃទី២៣ ខែមករា ឆ្នាំ២០១៨នេះថា “ថ្ងៃប្រជុំបក្ស តា លី ឡេង ចៅហ្វាយខេត្តត្បូងឃ្មុំ រាងរាសីដាក់ជាងគេ ត្រូវព្រនង់ខ្លាំងៗពីព្រះឥន្ទ រឿងបទល្មើសព្រៃឈើឆ្លងកាត់ ហើយទុកមួយអាទិត្យ អោយធ្វើកិច្ចការនេះ បើធ្វើមិនបាន អាចជ្រុះកៅអី!“។
ទោះជាបែបណា ក្នុងបណ្តាញសង្គមហ្វេសប៊ុកដដែល ហាក់បញ្ចេញទស្សនៈបែបអាណិតអាសូរបន្តិច ដោយលើកឡើងថា “តែអាណិតគាត់ដែរ បង្ក្រាបមិចបើឈ្មួញឈើធំៗ សុទ្ធតែក្រាក់ៗ ហើយពេលខ្លះកាច់ចង្កេះ សុំច្បាប់មកអំពេញ ស្រាប់តែប្រុចចូលត្បូងឃ្មុំ ដល់ដីយួនម៉ង!“។
អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត បានប្រាប់អង្គភាពសារព័ត៌មាន Cam Post នៅព្រឹកថ្ងៃអង្គារ ទី២៣ ខែមករានេះថា រឿងនេះ ជារឿងផ្ទៃក្នុងរបស់គណបក្ស ដោយលោកចាត់ទុកថា នេះជាការណែនាំរវាងថ្នាក់ដឹកនាំជាមួយថ្នាក់ក្រោម “.......វាជារឿងធម្មតាហើយអ្នកធ្វើមិនដែលចេះធ្វើត្រូវទេ”។ យ៉ាងណា លោកសុំមិនបរិយាយជុំវិញដែលថា នាយករដនាយករដ្ឋមន្រ្តី ស្តីបន្ទោសអភិបាលខេត្តត្បូងឃ្មុំ រឿងបទល្មើសព្រៃឈើឆ្លងកាត់។
ទាក់ទងនឹងព័ត៌មាននាយករដ្ឋមន្រ្តី ស្តីបន្តោសអភិបាលខេត្តត្បូងឃ្មុំ អង្គភាពសារព័ត៌មាន Cam Post នៅព្រឹកថ្ងៃអង្គារនេះ មិនអាចទំនាក់ទំនងសុំការបំភ្លឺពីអភិបាលខេត្តត្បូងឃ្មុំ លោក លី ឡេង ដែលទើបនឹងឡើងតំណែងបានទេ ដោយទូរស័ព្ទចូលមិនមានអ្នកទទួល។
បើតាមប្រភពព័ត៌មានពីមន្រ្តីជាន់ខ្ពស់ ដែលចូលរួមសន្និបាតគណបក្សផងដែរនោះ បានបង្ហើបប្រាប់អង្គភាពសារព័ត៌មាន Cam Post ដែរថា ក្នុងសន្និបាតនោះ មិនត្រឹមតែសម្តេចតេជោ ព្រមានអភិបាលខេត្តត្បូងឃ្មុំ ប៉ុណ្ណោះទេ សូម្បីតែអភិបាលខេត្តកំពង់ស្ពឺ លោក វី សំណាង និងអភិបាលខេត្តព្រះសីហនុ លោក យន់ មីន ក៏ត្រូវព្រមានស្រដៀងគ្នាផងដែរ ទាក់ទងទៅនឹងរថយន្តទំនើបៗ អត់មានពន្ធត្រឹមត្រូវ៕
