កណ្តាលៈ យុវជន៣នាក់ខ្ទាតផ្លោងធ្លាក់ផ្លូវស្លាប់ភ្លាមៗ ក្រោយពេលរថយន្ត Ranger Rover បុកអូស កាលពីម៉ោង៦ និង១០នាទីល្ងាច នៅថ្ងៃសុក្រ ៤រោច ខែបុស្ស ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៥ ខែមករា ឆ្នាំ២០១៨ នៅជិតវិទ្យាល័យខ្ពបវែង ស្ថិតក្នុងក្រុងតាខ្មៅ ខេត្តកណ្តាល។
សមត្ថកិច្ចមូលដ្ឋានប្រាប់អង្គភាពសារព័ត៌មាន CAM POST ឲ្យដឹងថា មុនពេលកើតហេតុ មានរថយន្តស៊េរីទំនើប១គ្រឿង ម៉ាក Ranger Rover ពណ៌ខ្មៅ ពាក់ស្លាកលេខ ភ្នំពេញ 2U-6977 បើកបរល្បឿនលឿនដូចហោះ ក្នុងទិសដៅពីលិចទៅកើត។ លុះមកដល់ចំណុចកើតហេតុ បានជែងម៉ូតូ១គ្រឿង ម៉ាកហុងដា MSX ពណ៌ខ្មៅលាយស អត់ស្លាកលេខ តែមិនផុត ក៏ជ្រុលបុកយ៉ាងពេញទំហឹង បណ្តាលឲ្យយុវជន៣នាក់ខ្ទាតផ្លោងធ្លាក់ចេញពីផ្លូវស្លាប់ម្នាក់ភ្លាមៗ និង២នាក់ទៀតបានដាច់ខ្យល់ស្លាប់ ពេលដឹកបញ្ជូនទៅមន្ទីរពេទ្យ។ ចំណែករថយន្តបង្ក បានបន្ថែមល្បឿនបើករត់គេចខ្លួនតាមផ្លូវលេខ១១៥ លុះដល់ស្តុបជិតកាកបាទក្រហមខេត្តកណ្ដាល ក៏បានប្លុងរថយន្តចោល រួចអ្នកបើកបរបានចុះរត់គេចខ្លួនបាត់ស្រមោល។
សមត្ថកិច្ចបានបញ្ជាក់ថា ជនរងគ្រោះទាំង៣នាក់ ទី១.ឈ្មោះ អ៊ីម សីហា អាយុ១៧ឆ្នាំ ភេទប្រុស ទី២.ឈ្មោះ វន វិសាល អាយុ១៧ឆ្នាំ និងទី៣.ឈ្មោះ ជា ភិរម្យ អាយុ១៨ឆ្នាំ ភេទប្រុស។ ទាំង៣នាក់នេះ រស់នៅម្ដុំផ្សារដើមអំពិល។
ក្រោយពេលកើតហេតុ រថយន្តបង្កត្រូវសមត្ថកិច្ចយកមករក្សាទុកនៅអធិការដ្ឋាននគរបាលក្រុងតាខ្មៅ។ ដោយឡែកសាកសពជនរងគ្រោះទាំង៣នាក់ សមត្ថកិច្ចបានធ្វើការទាក់ទងទៅសាច់ញាតិឲ្យមកទទួលយកទៅធ្វើបុណ្យតាមប្រពៃណី ខណៈអ្នកបើកបរបង្ក សមត្ថកិច្ចកំពុងស្រាវជ្រាវរកអត្តសញ្ញាណ ដើម្បីដោះស្រាយតាមផ្លូវច្បាប់៕
