ភ្នំពេញៈ ឃាតកម្នាក់ ក្នុងចំណោមបក្ខពួក៤នាក់ ដែលយកដំបងវាយសម្លាប់បុរសអាយុ២១ឆ្នាំ នៅខណ្ឌដង្កោ កាលពីយប់ថ្ងៃទី១៩ ខែ មករាឆ្នាំ ២០១៨ ត្រូវបានកម្លាំងនគរបាលខណ្ឌដង្កោឃាត់ខ្លួននៅព្រឹកថ្ងៃទី២០ ខែមករា ឆ្នាំ ២០១៨ វេលាម៉ោង៨នឹង២០នាទី នៅចំណុចភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ ខណៈបក្ខពួក៣នាក់ទៀតកំពុងរត់គេចខ្លួន។
អធិការខណ្ឌដង្កោ លោកវរសេនីយ៍ឯក ជឹម ស៊ីថា បានបញ្ជាក់ប្រាប់តាមទូរស័ព្ទថា ជនសង្ស័យ ដែលឃាត់ខ្លួនឈ្មោះ ឆាង ផានិត ភេទប្រុស អាយុ៣០ឆ្នាំ មុខរបរមិនពិតប្រាកដហើយបក្ខពួក៣នាក់ទៀត សមត្ថកិច្ចបានកំណត់អត្តសញ្ញាណ ហើយកំពុងតាមចាប់ខ្លួន។
ចំពោះមុខសមត្ថកិច្ច ជនសង្ស័យបានសារភាពថា មូលហេតុដែលពួកគេសម្លាប់ជនរងគ្រោះ គឺ ជនរងគ្រោះបានជិះកង់មកទិញថ្នាំញៀនពីរូបខ្លួន តែខ្លួនមិនព្រមលក់អោយ ក៏ជនរងគ្រោះគំរាមប្រាប់នគរបាលឲ្យចុះចាប់ ហើយភ្លាមៗនោះធ្វើឲ្យខ្លួនមានកំហឹងក៏បានទៅហៅបក្ខពួកបីនាក់ទៀតមកព្រួតគ្នាវាយជនរងគ្រោះ បណ្តាលឲ្យសន្លប់ស្តូកស្តឹងនៅកន្លែងកើតហេតុ រួចនាំគ្នារត់គេចដោយមិនដឹងថា ជនរងគ្រោះស្លាប់បាត់បង់ជីវិតទេ ដោយសាររូបគេនឹងបក្ខពួកគ្រាន់តែមានបំណងវាយឲ្យជនរងគ្រោះរៀងចាលប៉ុណ្តោះ គ្មានបំណងវាយសម្លាប់ឡើយ៕
