ភ្នំពេញៈ សម្រាប់ដំណើរការបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៤ ដែលនឹងប្រព្រឹត្តទៅ នៅពេលដ៏ខ្លីខាងមុខនេះ កងយោធពលខេមរភូមិន្ទ នៃក្រសួងការពារជាតិ បានត្រៀមខ្លួនរួចជាស្រេចហើយ ដើម្បីការពារសន្តិសុខ។
យោងតាមផេកហ្វេសប៊ុក លោក ឈុំ សុជាតិ អ្នកនាំពាក្យក្រសួងការពារជាតិបានចេញផ្សាយនៅព្រឹកថ្ងៃទី២១ កុម្ភៈ ២០១៨ បានឲ្យដឹងថា “កងទ័ពត្រៀមខ្លួន សហការការពារសន្តិសុខ សម្រាប់ដំណើរការបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៤”។
ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ របស់ព្រះរាជាណាចក្រកម្ពុជាយើង នឹងចាប់ផ្តើមនៅថ្ងៃអាទិត្យ ទី២៥ ខែកុម្ភៈ ឆ្នាំ២០១៨ ខាងមុខនេះ ដោយមានការិយាល័យបោះឆ្នោតចំនួន៣៣ នៅក្នុង២៥រាជធានី-ខេត្ត និងមានអង្គបោះឆ្នោតសរុបចំនួន១១,៦៩៥រូប ក្នុងនោះមានសមាជិកក្រុមប្រឹក្សាឃុំ/សង្កាត់ ១១,៥៧២រូប និងតំណាងរាស្ត្រ១២៣រូប។
ឆ្លើយតបនឹងស្ថានភាពនេះ កងយោធពលខេមរភូមិន្ទ នៃក្រសួងការពារជាតិ បានត្រៀមខ្លួនរួចជាស្រេច ក្នុងការសហការជាមួយ គណៈបញ្ជាការឯកភាពមូលដ្ឋាន ដើម្បីការពារសន្តិសុខសណ្តាប់ធ្នាប់សង្គម ជូនប្រជាពលរដ្ឋ ជាពិសេសការពារសន្តិសុខ ក្នុងដំណើរការបោះឆ្នោត ជ្រើសតាំងសមាជិកព្រឹទ្ធសភា នីតិកាលពី៤នេះ ដើម្បីធានាឱ្យការបោះឆ្នោតដំណើរការទៅយ៉ាងរលូន និងប្រកបដោយភាពសុខសាន្ត៕
