រាជធានីភ្នំពេញ ថ្ងៃទី៥ ខែកុម្ភះ ឆ្នាំ២០១៨ ឯកឧត្តម កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ថ្លែងបើក និងដឹកនាំអង្គសន្និបាតការងារត្រួតពិនិត្យគ្រឿងញៀនឆ្នាំ២០១៧ លើកទិសដៅការងារឆ្នាំ២០១៨ របស់អាជ្ញាធរជាតិប្រយុទ្ធប្រឆាំងគ្រឿងញៀន និងកិច្ចប្រជុំបូកសរុបលទ្ធផលនៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី២ឆ្នាំ២០១៧។
ក្នុងរបាយការណ៍ប្រចាំឆ្នាំរបស់អាជ្ញាធរជាតិប្រយុទ្ធប្រឆាំងគ្រឿងញៀនបញ្ជាក់ថាអាជ្ញាធរមានសមត្ថកិច្ចបង្ក្រាបបទល្មើសគ្រឿងញៀនបាន ៨១៧៣ ករណី ដោយកើនឡើង ៣៩២៧ ស្មើនឹង ៩២.៤៨% បើធៀបទៅនឹងឆ្នាំ២០១៦ មាន ៤២៤៦ ករណី។ ប៉ុន្តែរបាយការណ៍នេះ អ្នកប្រើប្រាស់គ្រឿង ញៀនថយចុះជាង ១២.៩% ស្មើនឹង១ ៤៣៥៣នាក់ បើធៀបទៅនឹងឆ្នាំ២០១៦មានចំនួន ២០ ៦២១ នាក់។
របាយការណ៍បន្ថែមថាអ្នកប្រើប្រាស់គ្រឿងញៀន៨៩% មានអាយុចាប់ពី១៨-៣៥ឆ្នាំ។ ក្នុងនោះសិស្សនិស្សិតប្រើប្រាស់គ្រឿងញៀន៩% កម្មករ និងពលករប្រមាណ៣៣% និងក្រុមមនុស្សគ្មានការងារពិតប្រាកដមានរហូតដល់៣៨%។
លោក កែ គឹមយ៉ាន បានថ្លែង ថាសកម្មភាព ចរាចរគ្រឿងញៀនខុសច្បាប់កើតមាននៅតាមបណ្តាខេត្តភាគឥសាននិងភាគកើតប្រទេសគឺព្រំដែនជាប់ប្រទេសឡាវ វៀតណាម និងប្រទេសថៃ។ លោក បន្ថែមថាឧក្រិដ្ឋជនគ្រឿងញៀនអន្តរជាតិបានព្យាយាមប៉ុនប៉ងប្រើប្រាស់កម្ពុជាធ្វើជាប្រទេសផលិតកែច្នៃនិងឆ្លងកាត់គ្រឿងញៀនខុសច្បាប់ទាំងតាមផ្លូវគោក ទឹកនិងអាកាស។ក្រុមឧក្រិដ្ឋជនអន្តរជាតិបានបោះទុនយ៉ាងច្រើនទៅឱ្យតំបន់ត្រីកោណមាសដើម្បីផលិតគ្រឿងញៀន។
លោក កែ គឹមយ៉ាន ថានឹងការទប់ស្កាត់ ការចរាចរគ្រឿងញៀន ជួញដូរគ្រឿងញៀនតាមច្រកព្រំដែន តាមច្រករបៀងនៃប្រទេសជិតខាងចូលមកប្រទេសយើង។ ជាពិសេសនៅព្រំដែនឡាវ វិធានការទប់ស្កាត់កុំមានអ្នកញៀនថ្មីនិងការពង្រឹងព្យាបាលអ្នកញៀនដែលមានស្រាប់ ពង្រឹងការពារព្យាបាលអ្នកញៀននៅតាមសហគមន៍និងយន្តការគ្រប់គ្រងអ្នកញៀនដែលសមាហរណ៍កម្មក្នុងសហគមន៍។
សរុបប្រចាំឆ្នាំ២០១៧ សមត្ថកិច្ចចាប់ឃាត់ខ្លួនជនសង្ស័យបាន១៧ ៧៩៥នាក់ ក្នុងនោះស្រីមាន១ ៥៨៤នាក់ កើនឡើង ៧ ៣៤៩នាក់ ស្មើនឹងជាង៨៤% ធៀបទៅនឹងឆ្នាំ២០១៦ មានចំនួន៩ ៩៣៣។
អាជ្ញាធររឹបអូសគ្រឿងញៀនចំនួនជាង១៩៦គីឡូក្រាមនិងគ្រឿងញៀនកៃច្នៃរួច១៨០គីឡូក្រាម។កញ្ឆាក្រៀម១១៦គីឡូក្រាមនិងកញ្ឆាស្រស់៣០៣ដើម បើធៀបទៅនឹងឆ្នាំ២០១៦រឹបអូសគ្រឿងញៀន១៧៩គីឡូក្រាម។
