ភ្នំពេញៈ រឿងបន្តិចបន្តូចឈានដល់ការប្ដឹងផ្ដល់ដាក់ពន្ធនាគារនារីម្នាក់ បន្ទាប់ពីរងបណ្ដឹងពីឧកញ៉ាចិត្តធម៌ លោក ឌួង ឆាយ ពេលនេះធ្វើឲ្យមហាជនមានការចាប់អារម្មណ៍ និងមានការរិះគន់ជុំវិញរឿងនេះ ដោយអ្នកខ្លះយល់ឃើញថា រឿងបន្តិចបន្តូច គួរណាស់សុំទោសបញ្ចប់រឿង ទើបជាការល្អ មិនគួរណា មានការប្ដឹងផ្ដល់ដាក់ពន្ធនាគារនោះទេ មិនតែប៉ុណ្ណោះធ្វើឲ្យពលរដ្ឋ និងអ្នកនយោបាយវ័យក្មេងចាត់ទុកថា ឧកញ៉ា ឌួង ឆាយ គឺជាឧកញ៉ាចិត្តធម៌ពណ៌ប្រផេះ។
ក្រៅពីផ្ដើមរឿងក្ដិចប្រដាប់ភេទកូនប្រុសឧកញ៉ា ឌួង ឆាយ អ្នកខ្លះបានប្រៀបធៀបកាលជំនាន់លោក ឌួង ឆាយ តាំងខ្លួនជាអ្នកហំហានធ្លាប់វាយ ធ្លាប់បាញ់ មិនរើសមុខឲ្យតែហ៊ានខ្លាំង ក្រោយមកប៉ះចំអ្នកខ្លាំង ធ្វើឲ្យឧកញ៉ា ឌួង ឆាយ ជាប់ទោស ដេកពន្ធនាគារ នេះហើយដោយសារតែភាពចង្អៀតចង្អល់ និងភាពអំនួត ក្រោយមកលោក ឌួង ឆាយ ក៏បានប្រែក្លាយទៅជាមនុស្សថ្មី ដែលចិត្តធម៌ និងសណ្ដោសប្រណី ទើបតែលើកនេះ លោកបែរជាមិនលើកលែង។
អ្នកនយោបាយវ័យក្មេង បានប្រៀបធៀប និងចាត់ទុកលោកឧកញ៉ា ឌួង ឆាយ គឺជាឧកញ៉ាចិត្តធម៌ពណ៌ប្រផេះ លើសពីនេះអ្នកនយោបាយវ័យក្មេង លោក ពេជ្រ ស្រស់ បានលើកឡើងថា “លោកឧកញ៉ាភ្លេចហើយឬនៅ ដែលលោកឧកញ៉ា ក៏ធ្លាប់វាយតប់លើកូនប្រុសអ្នកដទៃដែរ កាលប៉ុន្មានឆ្នាំមុននោះ? ហើយមាននរណាខ្លះស្រែកថា អយុត្តិធម៌សម្រាប់លោកឧកញ៉ា ដែលតុលាការកាត់ទោសឲ្យលោកឧកញ៉ាជាប់គុកនោះ”។
លោក ពេជ្រ ស្រស់ ប្រធានគណបក្សយុវជនកម្ពុជា ដែលតាំងខ្លួនជាគណបក្សប្រឆាំង បានសរសេរសារនៅក្នុងបណ្ដាញសង្គមហ្វេសប៊ុករបស់ខ្លួន នៅថ្ងៃទី២០ ខែកុម្ភៈ ឆ្នាំ២០១៨ នេះថា “ពេលនេះ លោកឧកញ៉ាពេញចិត្តហើយមែនទេ ដែលឃើញនារីក្រីក្រម្នាក់ជាប់គុកតាមប្រាថ្នារបស់លោកឧកញ៉ានោះ..? ពេលលោកឧកញ៉ាជាប់គុកមានមនុស្សជាច្រើនស្រែកថា វាមិនសម ឬជារឿងអយុត្តិធម៌ ដោយសារលោកឧកញ៉ាជាអ្នកមានស្តុក ក៏ប៉ុន្តែពេលនេះគ្មានជនណាម្នាក់ហ៊ានស្រែកជួយនារីត្រូវចោទនោះទេ ដោយហេតុនារីត្រូវចោទជាអ្នកស៊ីឈ្នួលមើលថែកូនឲ្យគេ ហើយជាអ្នកក្រថែមទៀតផង។ នាងអើយទ្រាំតាមកម្មទៅ ពីព្រោះនៅពេលបច្ចុប្បន្ននេះ មានឧកញ៉ាចិត្តធម៌ពណ៌ប្រផេះច្រើនណាស់”។
សូមបញ្ជាក់ថា ចៅក្រមស៊ើបសួរនៃសាលាដំបូងរាជធានីភ្នំពេញ លោក ជួន សុរាសី នៅថ្ងៃទី២០ ខែកុម្ភៈ ឆ្នាំ២០១៨ នេះ បានសម្រេចឃុំខ្លួននារីបម្រើម្នាក់ ឈ្មោះ អ៊ុំ សុផាន់ណា អាយុ២៣ឆ្នាំ ដាក់ពន្ធនាគារបណ្តោះអាសន្ន ដើម្បីស៊ើបសួរពីដំណើររឿងក្តិចប្រដាប់ភេទកូនប្រុសឧកញ៉ា ឌួង ឆាយ បណ្តាលឱ្យហើមខុសប្រក្រតី បន្ទាប់ពីលោកស្រី ស៊ឺ វណ្ណនី ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ចោទប្រកាន់ពីបទ ហិង្សាដោយចេតនា តាមមាត្រា២១៧នៃក្រមព្រហ្មទណ្ឌ។
ជនត្រូវចោទ អ៊ុំ សុផាន់ណា អំឡុងពេលចូលឆ្នាំចិន ត្រូវលោកឧកញ៉ា ឌួង ឆាយ ចាប់ខ្លួន ប្រគល់ឲ្យសមត្ថកិច្ចខណ្ឌសែនសុខ ចាត់ការតាមផ្លូវច្បាប់ បន្ទាប់ពីរងចោទថា ប្រើអំពើហិង្សាវាយដំទៅលើកូនប្រុសតូចៗរបស់ឧកញ៉ា ឌួង ឆាយ (ក្តិចប្រដាប់ភេទ)៕
