កែបៈ ជនដៃដល់ ដែលធ្វើសកម្មភាពអារ.កសម្លាប់នារីម៉ាស្សាម្នាក់ ក្រោយប៉ងចាប់រំលោភ តែមិនបានសម្រេច ពេលនេះ សមត្ថកិច្ចចាប់បានហើយ។
បើតាមសេចក្តីរាយការណ៍ បានឲ្យដឹងថា ឃាតកខាងលើ ក្រោយពីធ្វើសកម្មភាពសម្លាប់នារីរងគ្រោះរួចមក បានធ្វើដំណើរទៅកាន់ខេត្តកំពត ហើយត្រូវបានសមត្ថកិច្ចខេត្តកែប សហការជាមួយសមត្ថកិច្ចខេត្តកំពត ស្ទាក់ចាប់បាន នៅវេលាម៉ោង៩និង២០នាទីព្រឹកថ្ងៃទី២៨ កុម្ភ ឆ្នាំ២០១៨នេះ។
សមត្ថកិច្ច ដែលមានវត្តមានក្នុងពេលប្រតិបត្តិការនោះ បានឲ្យដឹងថា ជនដៃដល់ឈ្មោះ Sanchez Shawn Daniel ភេទប្រុស អាយុ២៥ឆ្នាំ ជនជាតិអាមេរិក មុខរបរទេសចរណ៍។
សូមរំលឹកថា នារីម៉ាស្សាម្នាក់ ត្រូវជនល្មើសប៉ងរំលោភតែមិនបានសម្រេច ហើយអារ.កសម្លាប់ចោល នៅបន្ទប់ម៉ាស្សាយីហោ "លីដាម៉ាស្សាខ្មែរ" ស្ថិតនៅផ្សារក្តាម ក្នុងភូមិថ្មី សង្កាត់ព្រៃធំ ក្រុងកែប ខេត្តកែប អំឡុងម៉ោងជិត៨យប់ថ្ងៃទី២៧ ខែកុម្ភៈ ឆ្នាំ២០១៨។
សមត្ថកិច្ច បានឲ្យដឹងថា នារីរងគ្រោះឈ្មោះ លុច គាន អាយុ២៧ឆ្នាំ មុខរបរអ្នកម៉ាស្សា មានប្តីឈ្មោះ ប៉ក់ សូនវិបុល អាយុ២៧ឆ្នាំ មុខរបរធ្វើស្រែ មានកូនស្រីម្នាក់ អាយុ៨ខែ។ សមត្ថកិច្ចបញ្ជាក់ថា ឪពុកក្មេក នារីរងគ្រោះឈ្មោះ សុខសំអាត វរសេនីយ៍ទោបញ្ជាការរងអាវុធហត្ថខេត្តកែប។
សមត្ថកិច្ច បន្តថា នារីរងគ្រោះត្រូវជនល្មើសប៉ុនប៉ងរំលោភមិនបានសម្រេច ព្រោះសពនារីរងគ្រោះ ត្រូវបានជនល្មើសស្រាតខោបានត្រឹមជង្គង់ ខណៈនារីរងគ្រោះកំពុងមានរដូវ ទន្ទឹមនឹងរំលោភមិនបាន ជនល្មើសក៏បានអារកសម្លាប់នារីរងគ្រោះ ដើម្បីបំបិទមាត់៕
