ព្រះសីហនុៈ យ៉ាងហោចណាស់ យុវតីម្នាក់ស្លាប់បាត់បង់ជីវិតភ្លាមៗនៅនឹងកន្លែងកើតហេតុ និងម្នាក់ទៀតរងរបួសជាទម្ងន់ ក្រោយបើកម៉ូតូជែងរថយន្ត១គ្រឿង ហើយជ្រុលចង្កូតទៅបុករថយន្ត១គ្រឿងទៀតពីមុខ កាលពីវេលាម៉ោងប្រមាណ៣ និង១០នាទី ថ្ងៃអាទិត្យ ៤រោច ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៤ ខែកុម្ភៈ ឆ្នាំ២០១៨ នៅផ្លូវជាតិលេខ៤ ចន្លោះគីឡូម៉ែត្រ១៩១-១៩២ ស្ថិតក្នុងភូមិបត់សិរមាន់ ឃុំព្រៃនប់ ស្រុកព្រៃនប់
ប្រភពពីកន្លែងកើតហេតុបានឲ្យដឹងថា មុនពេលមានគ្រោះថ្នាក់ គេឃើញម៉ូតូ១គ្រឿង ម៉ាកហុងដា ZOOMER X ពណ៌សលាយទឹកក្រូច ពាក់ស្លាកលេខ ព្រះសីហនុ 1G-0137 បើកបរដោយឈ្មោះ នួន ស្រីវី ភេទស្រី អាយុ២១ឆ្នាំ មានទីលំនៅភូមិជើងគោ ឃុំជើងគោ ស្រុកព្រៃនប់ ខេត្តព្រះសីហនុ មានអ្នករួមដំណើរម្នាក់ឈ្មោះ សុំភិន ភក្តី ភេទស្រី អាយុ១៦ឆ្នាំ មានទីលំនៅភូមិឃុំជាមួយគ្នា ធ្វើដំណើរក្នុងទិសដៅពីជើងទៅត្បូង។ លុះដល់ចំណុចខាងលើ បានបើកជែងរថយន្ត១គ្រឿង ស្រាប់តែជ្រុលចង្កូតទៅបុកពីក្រោយរថយន្ត១គ្រឿងទៀត ម៉ាក HIGHLANDER ពណ៌ប្រផេះ គ្មានស្លាកលេខ បើកបរដោយបុរសមិនស្គាល់អត្តសញ្ញាណ ក្នុងទិសដៅផ្ទុយគ្នាយ៉ាងពេញទំហឹង បណ្តាឲ្យយុវតីម្នាក់ស្លាប់បាត់បង់ជីវិត និងម្នាក់ទៀតរងរបួសធ្ងន់តែម្តង។
ដោយឡែកអ្នកបើកបររថយន្ត បានគេចខ្លួនបាត់ ក្រោយពេលកើតហេតុ។
បន្តិចក្រោយមក គេឃើញមន្ត្រីនគរបាលចរាចរ ចុះមកវាស់វែង និងអូសយករថយន្ត និងម៉ូតូ ទៅរក្សាទុកនៅអធិការដ្ឋាននគរបាលស្រុកព្រៃនប់ រង់ចាំដោះស្រាយតាមនីតិវិធី៕
