លោក ខឹម វាសនា ប្រមុខគណបក្សសម្ព័ន្ធដើម្បីប្រជាធិបតេយ្យ LDP ដែលពូកែខាងជេរ បានសរសេរក្នុងហ្វេសប៊ុកថា៖ អ្នកស្តាប់ LDP ហើយជេរ ស្អប់ LDP មានភាគច្រើនបំផុត មិនមែនព្រោះពួកគេគ្មានសមត្ថភាពយល់នូវអ្វីដែល LDP យើងចង់អោយពួកគេយល់នោះទេ តែគឺដោយសារពួកគេ មិនអាចលះបង់អំពើអាក្រក់របស់ខ្លួនគេបានតែប៉ុណ្ណោះ។
លោក ខឹម វាសនា ដែលមិនឈរឈ្មោះសម្រាប់ការបោះឆ្នោតខែកក្កដា ឆ្នាំ២០១៨ ខាងមុខ បន្ថែមថា៖ ពួកគេស្អប់ LDP ព្រោះពួកគេមិនអាចធ្វើល្អឱ្យដូច LDP ចង់បាន។ មនុស្សល្អពិតប្រាកដស្អប់មនុស្សអាក្រក់ណាស់ ហើយមនុស្សអាក្រក់ពិតប្រាកដក៏ស្អប់មនុស្សល្អខ្លាំងណាស់ដែរ។
លោក វាសនា ថាបើអ្នកពិតជាមានក្តីស្នេហាពិតចំពោះអ្នកណាម្នាក់ អ្នកត្រូវសម្គាល់ឱ្យច្បាស់ថា ក្នុងចិត្តអ្នក បានចំណាយពេលយ៉ាងច្រើនគិតដល់សុខទុក្ខអ្នកនោះ ជាងការគិតថា តើត្រូវបានអ្វីខ្លះពីមនុស្សដែលអ្នកនិយាយថាអ្នកស្រឡាញ់នោះ។
មួយរយៈចុងក្រោយ ប្រមុខបក្ស LDP ហាក់ស្ងប់ស្ងាត់ មិនសូវបញ្ចេញវោហារសព្ទ ដូចពីមុនទេ។
