កាលពីថ្ងៃទី១៤ ខែកុម្ភៈ ឆ្នាំ២០១៨ ក្រសួងមហាផ្ទៃបានសម្រេចដាក់ពាក្យប្តឹងមន្រ្តីសំខាន់៥រូបនៃចលនាសង្រ្គោះជាតិ ដែលបច្ចុប្បន្នកំពុងស្ថិតនៅក្រៅប្រទេស ពីបទធ្វើសកម្មភាពនយោបាយខុសច្បាប់។
ក្រសួងមហាផ្ទៃ តាមរយៈ លោក ខៀវ សុភ័គ អ្នកនាំពាក្យ បានអះអាងថាកាលពីពេលថ្មីៗនេះ ក្រសួងមហាផ្ទៃបានដាក់ពាក្យបណ្តឹងទៅសាលាដំបូងរាជធានីភ្នំពេញ ប្តឹងមន្រ្តីជាន់ខ្ពស់នៃចលនាសង្គ្រោះជាតិដែលកំពុងធ្វើសកម្មភាពនៅខាងក្រៅប្រទេស ពីបទធ្វើសកម្មភាពនយោបាយដោយខុសច្បាប់។
មន្ត្រីជាន់ខ្ពស់ទាំង០៤រូប នៃចលនាសង្គ្រោះជាតិ រួមមានដូចជា លោកសម រង្ស៊ី ប្រធានចលនាសង្គ្រោះជាតិ លោកអេង ឆៃអ៊ាង លោកស្រី មូរ សុខហួរ និងកញ្ញា កឹម មនោវិទ្យា (កូនស្រីលោកកឹម សុខា)។
ពាក់ព័ន្ធនឹងការដាក់ពាក្យប្តឹងមន្រ្តីជាន់ខ្ពស់នៃចលនាសង្រ្គោះជាតិនាពេលនេះ លោក អេង ឆៃអ៊ាង សហស្ថាបនិកនៃចលនាសង្រ្គោះជាតិ បានបញ្ជាក់ថា លោកមិនចាប់អារម្មណ៍ចំពោះចំណាត់ការនេះឡើយ មិនភ្ញាក់ផ្អើល ហើយក៏មិនចាប់អារម្មណ៍ដែរ ព្រោះថានេះមិនមែនជាលើកទី១ទេ ដែលរដ្ឋាភិបាលកម្ពុជាចាត់វិធានការមកលើអតីតគណបក្សប្រឆាំងធំជាងគេនៅកម្ពុជា។
យ៉ាងណាក៏ដោយ លោក អេង ឆៃអ៊ាង ដែលអះអាងថាជាសហស្ថាបនិកមួយរូបនៃចលនាសង្រ្គោះជាតិ ថាលោក មិនខ្វាយខ្វល់ចំពោះចំណាត់ការនេះឡើយ និងថាចលនាសង្រ្គោះជាតិ នឹងនៅតែបន្តសកម្មភាពតស៊ូដោយអហិង្សាពីក្រៅប្រទេស ដើម្បីឲ្យសហគមន៍អន្តរជាតិដាក់សម្ពាធលើរដ្ឋាភិបាលកម្ពុជា។
ចំណែកឯ លោក លី សុផាណា ព្រះរាជអាជ្ញារង និងជាអ្នកនាំពាក្យសាលាដំបូងរាជធានីភ្នំពេញ បានបញ្ជាក់ថា អយ្យការអមសាលាដំបូងបានទទួលបណ្តឹងនេះ ហើយកំពុងពិនិត្យនិងចាត់ការតាមនីតិវិធី។
សូមបញ្ជាក់ថា ចលនាសង្រ្គោះជាតិត្រូវបានបង្កើតជាផ្លូវការនៅថ្ងៃទី២៩ ខែមករា ឆ្នាំ២០១៨ ដោយ លោក សម រង្ស៊ី ទីក្រុងឡុងប៊ិច រដ្ឋកាលីហ្វញ៉ា សហរដ្ឋអាមេរិក។ រដ្ឋាភិបាលកម្ពុជាបានចាត់ទុកចលនាថ្មីនេះថា ជាពួកឧទ្ទាមក្រៅច្បាប់ ។
