នៅថ្ងៃទី១៥ ខែកុម្ភៈ ឆ្នាំ២០១៨ រដ្ឋាភិបាលជប៉ុនបានផ្តល់ជំនួយសម្រាប់គម្រោងទ្រង់ទ្រាយតូចសន្តិសុខមនុស្សជាតិ, KUSANONE នូវថវិកាសរុបចំនួន ៣៤២,៦៦៣ ដុល្លារអាមេរិក សម្រាប់ការអភិវឌ្ឍន៍លើបរិស្ថានសិក្សារបស់កុមារពិការក្នុងខេត្តកណ្តាល និងការសាងសង់អគារមន្ទីរពេទ្យក្នុងខេត្តតាកែវ មណ្ឌលគិរី និងខេត្តកំពង់ធំ។
តាមសេចក្តីប្រកាសព័ត៌មានរបស់ស្ថានទូតជប៉ុនប្រចាំកម្ពុជា គម្រោងសាងសង់ភូមិសហគមន៍សាមគ្គីធម៌ម៉ារីសកម្ពុជា នៅខេត្តកណ្ដាល ចំណាយទឹកប្រាក់ចំនួន ៧២,១៧៩ដុល្លារ។ គម្រោងនេះនឹងសាងសង់អគារសិក្សាថ្មី ៣បន្ទប់ ហើយតភ្ជាប់ផ្លូវប្រវែង ២២៥ម៉ែត្រ ជាកន្លែងដែលអង្គការជួយឧបត្ថម្ភដល់កុមារ និងយុវជនពិការភាព ដែលមានសិស្សប្រមាណ ៨០នាក់ ជារៀងរាល់ឆ្នាំ។
សម្រាប់ស្រុកបាទី ខេត្តតាកែវ គម្រោងសាងសង់អគារផ្នែកជំងឺទូទៅ និងជំងឺកុមារក្នុងមន្ទីពេទ្យបង្អែក ចំណាយទឹកប្រាក់ចំនួន ៩០,៧១២ដុល្លារ។ ដោយរំពឹងថា អគារថ្មីនេះ នឹងមានអ្នកជំងឺសម្រាកព្យាបាលទូទៅ ប្រមាណ ២,១០០នាក់ និងផ្នែកជំងឺកុមារ ៥៥០នាក់ អាចទទួលបាននូវសេវាសុខាភិបាលក្នុងបរិស្ថានវេជ្ជសាស្ត្រកាន់តែប្រសើរជាងមុន។
ចំណែកឯ ខេត្តមណ្ឌលគិរី គម្រោងសាងសង់អគារជំងឺទូទៅក្នុងមន្ទីរពេទ្យកោះញែក ចំណាយទឹកប្រាក់ចំនួន ៨៩,៧០០ដុល្លារ ហើយគម្រោងនេះ នឹងជួយលម្អបរិស្ថានវេជ្ជសាស្ត្រ ហើយនិងលើកកម្ពស់សមត្ថភាពផ្នែកផ្សេងៗទៀតនៃមន្ទីរនេះ។ ដោយរំពឹងថា ប្រជាជនប្រមាណ ១៨,០០០នាក់អាចទទួលសេវា ល្អជាងមុន។
រីឯ នៅស្រុកសន្ទុក ខេត្តកំពង់ធំ គម្រោងសាងសង់អគារសង្គ្រោះបន្ទាន់ក្នុងមន្ទីរពេទ្យបង្អែកបារាយណ៍ ចំណាយទឹកប្រាក់ចំនួន ៩០,០៧២ដុល្លារ។ គម្រោងសាងសង់អគារសង្គ្រោះបន្ទាន់ថ្មីនេះ នឹងជួយកែលម្អបរិស្ថានវេជ្ជសាស្ត្រអគារចាស់ ជាមួយគ្នានេះដែរ រំពឹងថា នឹងមានអ្នកជំងឺប្រមាណ ១,១០០នាក់ ជារៀងរាល់ឆ្នាំអាចទទួលសេវាសង្គ្រោះបន្ទាន់។
ក្រោយពិធីចុះហត្ថលេខា ផ្ដល់ថិវិកាឥតសំណង សម្រាប់គម្រោងទ្រង់ទ្រាយតូចសន្តិសុខជាតិ លោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំកម្ពុជាថ្លែងថា គម្រោងទាំងនេះ នឹងជួយកែលម្អធ្វើឲ្យប្រសើរឡើងនូវបរិស្ថានសម្រាប់កុមារ និងយុវជនពិការភាព។ លោក បន្តថា អគារសាងសង់ថ្មី ផ្នែកជំងឺទូទៅ និងជំងឺកុមារ ហើយនិងអគារសង្គ្រោះបន្ទាន់ នឹងមានមានមនុស្សជាច្រើនទទួលបានសេវាថែទាំសុខភាពល្អប្រសើរជាងមុនដែលមានការយកចិត្តទុកដាក់ ហើយជួយកែលម្អវេជ្ជសាស្ត្រ ព្រមទាំមលើកកម្ពស់សមត្ថភាពពេទ្យផ្នែកផ្សេងៗផងដែរ។
សូមបញ្ជាក់ថា គម្រោងជំនួយ KUSANONE របស់ជប៉ុននេះ បានចាប់ផ្ដើមអនុវត្តតាំងពីឆ្នាំ១៩៩១។ មកដល់ពេលនេះជប៉ុនបានផ្ដល់ថិវកាដល់កម្ពុជា តាមរយៈគម្រោងជំនួយមានថវិកាសរុបជាង ៥៧លានដុល្លារអាមេរិកហើយ ដើម្បីគាំទ្រដល់កិច្ចខិតខំប្រឹងប្រែងក្នុងការអភិវឌ្ឍនិងស្ថាបនានៅតាមមូលដ្ឋានប្រទេសកម្ពុជាឡើងវិញ។
រីឯជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុន បានចាប់ផ្ដើមពីឆ្នាំ២០០២ សម្រាប់គាំទ្រដល់សកម្មភាពនៃអង្គការក្រៅរដ្ឋាភិបាលប៉ុន ក្នុងការប្រឹងប្រែងជួយដល់ការអភិវឌ្ឍ និងស្ថាបនាប្រទេសកម្ពុជា ដែលមានថវិកាសរុបជាង ៣០លានដុល្លារ។ ជំនួយទាំងនេះ សម្រាប់ទ្រទ្រង់គម្រោងចំនួន ១០៥ ដោយផ្ដោតសំខាន់លើវិស័យអប់រំ សុខាភិបាល កសិកម្ម និងសកម្មភាពបោសសម្អាតមីន។ នេះបើតាមសេចក្ដីប្រកាសព័ត៌មានរបស់ស្ថានទូតជប៉ុន៕
