កាលពីថ្ងៃទី២១ ខែកុម្ភៈ ឆ្នាំ២០១៨ តុលាការដំបូងខេត្តកំពតបានសម្រេចឃុំខ្លួនគ្រូឱសថបុរាណខ្មែរម្នាក់ ដែលបានលក់ថ្នាំផ្សំចេញពីឫសឈើដោយសង្ស័យថាមានសារជាតិពុល ដែលធ្វើឱ្យមនុស្សម្នាក់ស្លាប់និងម្នាក់រងរបួសធ្ងន់ ដោយចោទពី មនុស្សឃាតដោយអចេតនា តាមច្បាប់នៃមាត្រា ២០៧ នៃក្រមព្រហ្មទណ្ឌ។
កាលពីថ្ងៃទី១៤ ខែកុម្ភៈ ឆ្នាំ ២០១៨ ជនរងគ្រោះបានទិញឱសថបុរាណខ្មែរ យកទៅត្រាំស្រាផឹក ពីជនជាប់ចោទ នៅភូមិកំពង់គ្រែង ឃុំកំពង់គ្រែង ស្រុកទឹកឈូ ខេត្តកំពត។
លោក ម៉ាន់ បូរេត អ្នកនាំពាក្យសាលាដំបូងខេត្តកំពតបញ្ជាក់ថាក្រោយពីបានធ្វើការចោទប្រកាន់ ជនជាប់ចោទក៏ត្រូវបានមន្ត្រីបញ្ជូនទៅឃុំខ្លួនបណ្ដោះអាសន្ននៅពន្ធនាគារ។
ជនជាប់ចោទឈ្មោះ លោកគ្រូ អ៊ឹង ឈាន់ ហៅ កៅ ចំណែកឯជនរងគ្រោះដែលស្លាប់មានឈ្មោះ សំ វណ្ណា ភេទប្រុស អាយុ៦០ឆ្នាំ រស់នៅភូមិកើតហេតុ និងបុរសដែលកំពុងធ្វើការសង្គ្រោះបន្ទាន់ ឈ្មោះ ហ៊ួត ភេទប្រុស អាយុ៥០ឆ្នាំ រស់នៅភូមិសុវណ្ណសាគរ សង្កាត់កំពង់កណ្តាល ក្រុងកំពត ខេត្តកំពត ពួកគេជាមិត្តភក្ដិនឹងគ្នា។
យោងតាមការសួរចម្លើយពីក្រុមគ្រួសារជនរងគ្រោះ បានប្រាប់ថាជនរងគ្រោះទាំងពីរបានអង្គុយផឹកស្រាថ្នាំក្លែមសាច់ឆ្កែជាមួយគ្នា លុះបន្តិចក្រោយមក ស្រាប់តែជនរងគ្រោះទាំងពីរបានក្អួតចង្អោរ មានសភាពគួរឲ្យបារម្ភ ក៏បានដឹកជនរងគ្រោះតាមរថយន្តទៅសង្គ្រោះនៅឯមន្ទីរពេទ្យប្រទេសវៀតណាមតែម្តង ប៉ុន្ដែស្ថានភាពធ្ងន់ធ្ងរពេក បុរសម្នាក់បានស្លាប់ តាមផ្លូវធ្វើដំណើរទៅប្រទេសវៀតណាម។
សូមបញ្ជាក់ថា កាលពីថ្ងៃទី១៤ ខែកុម្ភៈ ឆ្នាំ២០១៨ ដែលជាថ្ងៃកើតហេតុ នៅភូមិកំពង់គ្រែង ឃុំកំពង់គ្រែង ស្រុកទឹកឈូ ខេត្តកំពត លោ អ៊ឹង ឈាន់ (ជនជាប់ចោទ)បានយកថ្នាំឫសឈើមួយកញ្ចប់មកលក់ឲ្យលោក សំ វណ្ណា (ជនរងគ្រោះ ស្លាប់) ហើយគ្រូថ្នាំរូបនេះក៏ចេញទៅវិញដែរ។ លុះដល់ម៉ោង ១១ ព្រឹក លោក សំ វណ្ណា និង លោក ហ៊ួត (ជនរងគ្រោះ)ក៏បានសាច់ឆ្កែមួយដុំ នាំគ្នាចម្អិនផឹកស្រាដែលត្រាំថ្នាំនោះ ក្លែមជាមួយសាច់ឆ្កែ។ ក្រោយមកអ្នកទាំងពីរស្រាប់តែមានអាការៈក្អួតចង្អោរ ទន់ដៃ ទន់ជើង រឹងក និយាយមិនរួចតែម្ដង។ ក្រោយពីក្រុមគ្រួសារជនងរគ្រោះយកស្រាថ្នាំនោះឲ្យពេទ្យពិនិត្យ ទើបដឹងថា ស្រាថ្នាំនោះមានជាតិពុល។
បើតាមការបំភ្លឺពីសំណាក់គ្រូផ្សំឱសថបុរាណឈ្មោះ អ៊ឹង ឈាន់ (ជនជាប់ចោទ)បានប្រាប់ថា មុនកើតហេតុ ឈ្មោះសំ វណ្ណា បានកុម្ម៉ង់ឲ្យខ្លួនផ្សំថ្នាំខ្មែរយកត្រាំស្រាផឹកសម្រាប់ការពាររោគហឺត ទើបខ្លួនបានផ្សំជូនតាមការកុម្ម៉ង់ ក្នុងនោះមានផ្កាស្លាក់(ផ្កាពុល) ដោយបានប្រាប់ទៅជនរងគ្រោះថា ថ្នាំនេះបើយកមកត្រាំស្រាត្រូវទុករយៈពេល១០ថ្ងៃទើបអាចពិសារបាន បើហូបភ្លាមអាចពុលស្លាប់មិនខានឡើយ។ បន្ទាប់ពីបានផ្តាំរួចហើយជនរងគ្រោះ ក៏យកថ្នាំទៅត្រាំស្រា ប៉ុន្តែជនរងគ្រោះមិនបានអនុវត្តតាមបណ្តាំ គឺត្រាំភ្លាមផឹកភ្លែតតែម្តង ទើបបណ្តាលឲ្យពុលស្លាប់បែបនេះ។