ថ្ងៃទី ៦ ខែកុម្ភៈ ឆ្នាំ២០១៨នេះ កញ្ញា ធី សុវណ្ណថា ត្រូវបានអញ្ជើញចូលរួមកិច្ចប្រជុំ នៅក្នុងកម្មវិធី «Queen of the Spa Korea 2018» ដោយការប្រកួតសមត្ថភាពនេះ មានការចូលរួមពីបេក្ខនារីចំនួន ១២ប្រទេស ក្នុងនោះកញ្ញាតំណាងឲ្យប្រទេសកម្ពុជា។
ក្រោយពីសារបង្ហោះជាហូរហែកាលពីម្សិលមិញមក យើងសង្កេតឃើញថាគណនីហ្វេសប៊ុកលោក Chengchon Son សម្ដែងការមិនពេញចិត្តជាខ្លាំងចំពោះការសរសេររបស់កញ្ញាថា៖
ខ្ញុំមានការសោកស្តាយជាខ្លាំង ដែលបានឃើញសារបង្ហោះ នៅលើទំព័រហ្វេសប៊ុករបស់កញ្ញា ធី សុវណ្ណថា ដែលជាកូនខ្មែរ និងជាតំណាងឲ្យប្រទេខ្មែរទាំងមូល ទៅចូលរួមកម្មវិធី “Queen of the Spa Korea 2018” នៅវៀតណាម និងនាងថែមទាំងអះអាងថា តំណាងឲ្យជាតិកម្ពុជាផងនោះ តែនាងមិនហ៊ានហៅឈ្មោះ «ព្រៃនគរ» ជាភាសាខ្មែរ បែរជាហៅតាមយួនថា «សាយហ្គង» ទៅវិញ (បើហៅ «សាយហ្គង» ទៅហើយនោះ ខ្ញុំជូនជាយោបល់ឲ្យហៅតាមយួនថា «ហូ ជីមិញ» វិញទៅ ព្រោះមនុស្សជាទូទៅគេស្គាល់ច្រើន) ។
ពួកខ្ញុំ នៅកម្ពុជាក្រោម ខិខិតណាស់ ក្នុងការរក្សាហៅឈ្មោះជាភាសាខ្មែរ ខណៈយួនព្យាយាមលុបបំបាត់ ។ ជាពិសេស គ្រប់តំបន់ភូមិសាស្ត្រនៅកម្ពុជាក្រោម ដែលរដ្ឋាភិបាលវៀតណាម បានប្ដូរឈ្មោះទៅជាភាសាយួន បន្ទាប់ពីពួកគេបានចូលធ្វើអាណានិគមលើពលរដ្ឋខ្មែរក្រោមម្ចាស់ស្រុកក្តី ក៏យើងខ្ញុំ នៅតែហៅតាមឈ្មោះភូមិសាស្ត្រ តាមភាសាដើមដដែល ពោល គឺហៅតាមភាសាខ្មែរ ។
ថ្វីត្បិតតែរដ្ឋាភិបាលវៀតណាម បានប្រើឈ្មោះខេត្ត ឬក្រុងជាផ្លូវការថា ដូចជា «ព្រះត្រពាំង» យួរនប្តូរទៅ «ត្រាវិញ» និង «ព្រៃនគរ» ប្តូរទៅ «ហូ ជីមិញ» ឬ «សាយហ្គង» ក្តី ក៏ពលរដ្ឋខ្មែរក្រោម នៅតែហៅឈ្មោះខេត្ត/ក្រុងជាភាសាខ្មែរដដែល ដូចជា ព្រះត្រពាំង, ពលលាវ, មាត់ជ្រូក, ក្រមួនស និងឃ្លាំង ជាដើម ។
បើទោះជាដែនដីកម្ពុជាក្រោម ជាទឹកដីមួយផ្នែករបស់ប្រទេសកម្ពុជា ឋិតនៅភាគត្បូងប្រទេសវៀតណាម ត្រូវបានបារាំងកាត់ឲ្យវៀតណាមនៅថ្ងៃទី ០៤ ខែមិថុនា ឆ្នាំ ១៩៤៩ ។ បើគិតមកដល់ឆ្នាំ ២០១៨ នេះ មានរយៈពេល ៦៩ ឆ្នាំហើយ ដែលពលរដ្ឋខ្មែរក្រោមរស់នៅក្រោមការត្រួតត្រារបស់អាណានិគមវៀតណាម បន្តពីអាណានិគមបារាំង ។ យ៉ាងនេះក្តី ខ្មែរក្រោមនៅកម្ពុជាក្រោម នៅតែនិយាយគ្នាជាភាសាខ្មែរ និងប្រើអក្សរខ្មែរនៅក្នុងសហគមន៍របស់ខ្លួនជានិច្ច បើទោះបីភាសា និងអក្សរជាផ្លូវការផ្នែករដ្ឋបាលរបស់រដ្ឋាភិបាលវៀតណាម បច្ចុប្បន្នជាភាសាយួនក្ដី ។ ជាពិសេស ទាក់ទិន នឹងការហៅភូមិសាស្ត្រ គឺនៅតែហៅតាមភាសាខ្មែរ ។
